“𝘼𝙣𝙜𝙜𝙤 𝙉𝙖𝙞𝙗𝙖𝙩𝙖 𝙨𝙚𝙙𝙤 𝙟𝙤𝙡𝙢𝙖 𝙧𝙖 𝙢𝙖𝙧𝙡𝙖𝙙𝙪𝙣𝙜, 𝙨𝙚𝙙𝙤 𝙖𝙣𝙖𝙠 𝙣𝙞 𝙟𝙤𝙡𝙢𝙖 𝙧𝙖 𝙢𝙖𝙣𝙤𝙡𝙨𝙤𝙡𝙞 𝙙𝙞𝙧𝙞𝙣𝙞. 𝙎𝙚𝙣𝙜 𝙖𝙣𝙟𝙖𝙞 𝙡𝙪𝙖𝙧𝙤𝙣𝙠𝙤𝙣𝙣𝙞 𝙝𝙖𝙩𝙖𝙣𝙞 𝙨𝙚𝙣𝙜 𝙥𝙖𝙨𝙖𝙪𝙙𝙤𝙣𝙣𝙞 𝙖𝙩𝙖𝙥 𝙝𝙖𝙩𝙖𝙤𝙣𝙠𝙤𝙣𝙣𝙞 𝙖𝙩𝙖𝙥 𝙖𝙝𝙖 𝙡𝙖𝙣𝙜 𝙗𝙖𝙝𝙚𝙣𝙤𝙣𝙣𝙞 𝙣𝙖 𝙢𝙖𝙙𝙚𝙖𝙧”.
(4 Musa 23:19) *)
Anggo sanggah marsitaronon hita bani angkula, uhur atap tonduy, mahol do banta manjolom bagah-bagah ni Naibata, songon na maborattu do ai, songon na so tarpaosor be ai. Umpamani hata on “Porini pe gerger dousamu songon hasumba, lopak do bahenonku songon nitak”, atap ihatahon: “Mulak ma ho ale anak na marbalik in hupamalum pe panundalionmu”. Songon na so tarsuhuni Naibata ninuhur bagah-bagahni ai.
Anggo ibasa hita hata ni Naibata pansarihon-Ni banta, gari jambulanta sangkamata ibilang, samintolah ma hita hibul, sai paluahon-Ni do hita, bani panorang jut ni uhurta, asal ma mulak hita hu Bani.
Naibata do na marbagahkon ai ampa bagah-bagah na legan ope. Itandai do anak ni manisia, ganup itandai do. Ibotoh do dousa ni sidea ampa panlanggaronni, tapi ibere do bagah-bagahni ai. Sedo la jolma ra marladung atap anak ni jolma ra manolsoli diri. Na dob iluarhon lang ibahen? Na dob ihatahon lang bahenonni na madear? Hatengeran ni uhur do Naibata anjaha na sintong anjaha haporsayaan. Bereonni do idop ni uhu-Ni bani sagala na roh hu Bani.
Ase jolom hita ma hata-Ni pakon sagala bagah-bagah-Ni. Aima pasonangkon uhur ni na marsitaronon, mardingat hata ni Naibata pakon manjolom sagala bagah-bagahni. Na misir do uhurni humbani sitaronon ai laho hu lobei ni Naibata.
Dua do dalan ni Naibata pahampung sitaronon ni jolma: Ibuati sitaronon, siporsanon ai atap itambahi gogoh manaron.
Songon Tuhan Jesus, seng ibuati Naibata sitarononni na iputuskon i Getsemane bani na martonggo Tuhan Jesus, tapi isuruh do malekat-Ni margogohi Tuhan Jesus.
Tarbahen Naibata do tambah gogohta, semangatta manaron. Na porlu banta ibagas goluh on: Mardingat pakon manjolom hata ni Naibata pakon bagah-bagah-Ni.
Tenger ni uhur bani bagah-bagah ni Naibata ai ma pasabar uhur bani sagala sitaronon.
Tonggo
Ham Tuhan Naibata! Suruh Ham ma bangku TonduyMu, ase tenger tumang uhurhu bani hata-Mu pakon sagala bagah-bagah-Mu, ia aha pe na masa bangku. Amen.
Doding
Haleluya No. 156: 1, 3, 4 Inggot Pe Lutu Ganupan
1. Inggot pe lutu ganupan sai na sonang do use
Jesus do sai pasonangkon aha na humutik be3. Tong itangihon Tuhanta hita na martonggo in .
Janah itatap Tuhanta ganup tinobus-Ni in.4. Tenger uhurmu bai Jesus, na patorsa langkahmin;
Sai haholongi ma Jesus na pasonang uhurmin
~Pdt J Wismar Saragih, Tadah ni Tonduyta
*) Terjemahan baru (1976): “Anggo Naibata sedo jolma na ra marladung, barang anak ni jolma na ra manolsoli dirini. Mintor hatahononni ma, lang bahenonni sonai”?
6 Oktober: Mase otik malas ni uhur bani na manjalo Ambilan Na Madear? >>
Recent Comments