5 Mei: “..matei hita pasal dousa …. manggoluh bani hapintoron”

“Iporsan do dousanta ibagas angkula-Ni hubani hayu ai, ase matei hita pasal dousa, gabe manggoluh bani hapintoron”.

(1 Petr. 2 : 24)

Iporsan Tuhan Jesus do dousanta bani hayu parsilang ai. Iporsan do dousamu pakon dousangku ijai. Manaron na parngit do Ia janah matei use boi ham mardamei pakon Naibata. Sedo pitah ai tujuanni. Manaron na marsik do Tuhanta janah matei, ase matei homa hita pasal dousa anjaha manggoluh bani hapintoron.

Dob dapot hita hasasapan ni dousa ibagas goran ni Tuhan Jesus ulang hita soh ijai. Ningon puho do hita humbani tanoman ni dousa janah mardalanbani goluh hapansingon, hapintoron. Ai ma deba tujuan ni parmatei pakon ni Tuhan Jesus banta. Lang be hita ra mambalosi dousa pakon na so pintor. Tapi dompak Naibata ma langkahta, mangidangi Naibata ma hita ibagas hasintongan. Ai ma deba tujuan ni parmatei ni Tuhan Jesus banta, ase borsih homa hita. Anggo idingat hita ai borat ma uhurta laho mardousa. domma pala iarou Tuhan Jesus dousangku. Ai ma mangojur hita bani goluh na pansing.

Porlu do bagas iarusi hita anjaha iahapkon hita hata on: “Iporsan do dousanta ibagas angkulani hubani hayu ai, ase matei hita pasal dousa gabe manggoluh bani hapintoron“.

Sonaha, ai nape sungkup pangkarat ni sitaronon ni Tuhan Jesus ai manirang hita humbani dousa? Nape sungkup ai mangojur hita mandalankon rosuh ni Naibata? Laho mangidangi Naibata? Bani parmatei ni Tuhan Jesus ai sungkup ma partobuson pasal dousanta, lang dong dalanni be ase iparjabolon dousa hita. Ulang be hita ra jadi jabolon ni dousa, domma salosei utang dousanta igalar Tuhanta.

Tonggo

Ham Tuhan Jesus! Sasap Ham ma hurang ni haporsayaonnami. Pargogohi ham ma tonduynami ase tongon matei hanami pasal dousa, tapi gabe manggoluh ibagas hapintoron, na dob tinagangMu marhitei parmateiMu.

Amen.

Doding

Haleluya No. 58 : 1,4: Sada do Hansa Sura-surangku >>

1. Sada do hansa surang-surangku bai ganup dunia on.
Seng anjai lang malas uhurhu anggo jumpah au ma on
Sihol sai ingaton ni uhurhu na binaen ni Jesus bai tonduyhu
Sanggah pinorsan-Ni in haganup dousangkin.

4. Gok Bamu ma au, ale Tuhanku, janah Ham ma rupeihin.
Amen, rokamhon Ham ma bangku, goran-Mu bai uhurhin.
Rosuh-Mu na mando sungkunonku bai ganup na lao horjahononku.
In ma parpadanankin hu bamu, o Jesuskin.

6 Mei: “Holong do uhurmu Bangku”? >>

<< 4 Mei: “Hutanda Do Sagala na Bangku”