“Ahu do Parmahan Na Dear; hutanda do sagala na bangku”.
(Joh. 10 : 14)
Hata in sihol ma mambere malas ni uhur banta. Dong do parmahanta iatas. Jesus Kristus, na dob matei tarsilang janah puho humbani na matei. Dirini do iberehon paluahkon hita humbani munsuhta. dousa ai, hamatean pakon sibolis. Domma iauhon hita Ia marhitei pandidion na pansing in. Isahapkon do bani ganup hita na porsaya Bani. “Ahu do simada ho”. Halani ai ijaga do hita janah iramotkon dompak sagala parmaraan, bani ganup panorang parlajoan.
Anggo manirpang hita hubani dalan na legan ibagas goluh pardagingonta on, ipindahi do hita ibagas holongni. Anggo mulak hita hu Bani, marmalas ni uhur do Ia manjalo hita ampa manasap dousanta. Ijalo dohita ibagas malas ni uhur pakon holong ni uhur.
Jadi hita pe marmalas ni uhur ma anjaha martarima kasih. Marmalas ni uhur ma hita ibagas Kristus Sipaluah hita, ninta ma: “Napudji ma Ham Jesus, Parmahan na dear in. Ai tarlobih do holongmu bangku pakon idop ni uhurmu”. Halani ai huhatahon ma bani haganupan: Mulak ma hita bani Jesus. Ulang soh be bani dousa pakon hajahaton. Roh ma ham bani Sipaluah Parmahan ni tonduyta. Siholan do Ia bamu. Ipaima-ima do ham. Mulak ma hita hu Bani. Sihol paluahonni do ham humbani dousamu, ase margoling pusok uhurmu gabe malas ni uhurmu.
Sintong do Tuhan Jesus Parmahan na madear, ididah do ham janah itanda. Ididah do hahuranganku pakon hagalekonku. Iurupi do ahu pasal ai. Pangahap na sonai ai ma na porlu bani hita biri-biri na pinarmahanni.
Tonggo
Ham Tuhan Jesus! Tarima kasih ma Bamu, ai Ham do siparmahan ahu janah iurupi ham do ahu mangimbang dousa pakon sagala parlajoan, na roh hu bangku.
Amen.
Doding
Haleluya No. 127: 1,3: Jahowa Siparmahan Au >>
1. Jahowa Siparmahan au, aha pe lang hurangni.
Na sambor pe sai ipadaon, do humbai pinahan-Ni
Tudu ibaen na lambut in, lao pagoluhkon tonduyhin.
Ibaen holong atei-Ni.3. Itanoh hamateian pe seng pala habiaran.
Ai isondangi do hape sonang do au mardalan.
Simambu pakon tungkot-Mu do pasonangkon uhur hin,
Hal do sijolomanku.
5 Mei: “..matei hita pasal dousa …. manggoluh bani hapintoron” >>
Recent Comments