4 Januari: Manandai Naibata? Ia do pabotohkonsi!

tnt_jan4_manandanaibata.jpg

Seng ongga dong na mangidah Naibata; pitah Anak sasada na i abingan ni Bapa in, Ia do patorangkonsi.

(Johanes 1:18)

Terj. baru (LAI, 1976) “Ise pe lang na ongga mangidah Naibata; Anak na sasada in, na bani abingan ni Bapa in, Ia do na pabotohkonsi”

Ulang ninuhurmu daoh Naibata halani seng ongga ididah hita jolma Ia. Tapi Jesus Anak ni Naibata do parhiteanta mangidah Naibata.

Ra do ninuhurta na pansing tumang do Naibata halak pardousa do hita jolma. Anggo singgan sonai hansa uhurta iahap hita, padaoh-daoh ma Naibata bani jolma. Tapi sonaha do Tuhan Jesus dompak pardousa? Ijalo Tuhanta do pardousa, isasap do dousani. Iajari Tuhan Jesus do hita marubah tutur dompak Naibata: Lang be marompung, marbapa ma hita bani Naibata.

Ase domma sangkan tumang hita gabe anak ni Naibata. Lang ididah mata ni angkulanta, tapi torang do ididah mata ni uhurta, mata ni haporsayaonta, gabe iahap hita sangkan hita bani Naibata. Iparsahapkon Naibata do hita marhitei hata na tarsurat bani Bibel (Padan na Basaia pakon Padan na Baru). Iparsahapkon hita do Naibata marhitei tonggonta ampa dodingta.

Porini lang pe ope ididah uhurmu Naibata, tapi ham torang do ididah Naibata. Porlu do iahapkon hita ai ase mabiar janah magigi hita mangkorjahon dousa. Dohor do Naibata ilambungta, ra do Naibata mangkasomani hita ari-ari. Tuhan Jesus na i abingan ni Bapa ai do patorangkon ai banta marhitei hatani pakon Tonduyni.

Tonggo

Ham Tuhan Jesus! Sai patidak Ham ma Bapa in bannami marhitei hatamu pakon Tonduymu, ase tangkas itandai hanami holong ni uhur-Ni na banggal ai bannami. Amen.

Doding

Haleluya No. 13 : 1, 3, 5. Sai Jolom Ham Tanganku >>

1. Sai jolom Ham tangan ku, sai togu au
Ronsi rotap hosahku, parorot au;
Na dong au ra mardalan, sahalak au
Sai Ham ma ale Tuhan manogu au

3. Ai anggo hasunsahan, buei do in
Sonai pe pangahapan, sonang do in
Age golap huidah i tanoh on
torang do marpangidah bai uhurhon.

5. Sal jolom Ham tanganku, sai togu au.
Ronsi rotap hosahku jagai Ham au.
Patorang Ham langkahku hu surga in.
Ham ma patunggungonku tongtong ijin.

5 Januari: Anggo ijalo ham Jesus >>

<< 3 Januari: Ijai sundat ma hita mardousa