“Hupaherbang do Tanganku ari-ari dompak bangsa na manendel, na mandalani dalan na so madear, mangihutkon rosuh ni uhurni sandiri”
(Jesaya 65 :2)
Mase lang maluah Israel? Salah ni Naibata do ai? Lang! Ai ipaherbang do tanganni ari-ari, sirsir do Naibata manjalo sidea rap ampa dousani ampa panundalionni. Ipaherbang Naibata pe tanganni laho mangkopkop sidea, sai lunsat do sidea mandalani dalan na so madear.
Buei do jolma na so saud maluah. Salah ni Naibata do? Lang! Tong do ipaherbang Naibata tanganni manjalo hita (dalahi age naboru), ulang namin mardalan jolma in mansuhuni rosuhni sandiri hubani na so madear, tapi hu dalan pardamean ma.
Dalan na sonaha do harosuh ni Naibata dalananta? On do dalan ai: Porsaya namin hita bani Tuhan Jesus Kristus, ase maluah hita. Porsaya bani Jesus na matei halani dousanta janah puho bahen hapintoranta. Anggo porsaya ma gabe anak ni Naibata ma hita. Anggo uhur-uhurta do isuhuni hita seng boi porsaya hita. Seng porsaya janah tenger uhurta bani Naibata. Anggo dalan ni hita jolma gatian do ai tuadan, susur dompak suah. Seng piga hali ipilih jolma dalan tangkogan, naik dompak buntu. Tongon, urahan do pangahap na dompak suah ai, maholan do dompak buntu, Tapi ujung ni dalan na dua ai: Na urah ai ujungni hu lombang do, ma mahol ai hu atas do dobni.
Ulang be isuhuni uhurta rosuh ni uhurta, ai hamagoan do ujungni, tapi mulak ma hita bani Naibata, age pe mahol ai, ai sirsir do Naibata manjalo hita. Na porlu ingatonta: Ari-ari do sihol patumpuon ni Naibata hita hu Bani, ulang be mandaoh-daoh hita. Ulang hampung uhurta bani holong ni atei ni Naibata.
Tonggo
Ham Bapanami na i nagoriatas! Bere Ham ma bannami idop ni uhurMu, ase sai mulak hanami bani tanganMu na herbang in manjalo hanami, halani Tuhan Jesus Kristus. Amen.
Doding
Haleluya No. 152 : 1, 5 : Na Sonang Au Dob na Mar Tuhan Au
1. Na sonang au dob na mar Tuhan au bai Tuhan Jesus in.
Ai lang be dong dob jabolon-Ni au sihoruonkonkin.
Ai Ia mado huirikkon, dunia on ma hutundalhon,
Sonang ma au! Sonang ma au!5. Sonang ma au, anggo marsaran au, bai abingan-Ni in.
Na parngit in ‘tor itadingkon au, dob ondos au hujin.
Nuan na porlu bai uhurhu: Sai surga in ma bongkotanku.
Martuah au! Martuah au!
Recent Comments