3 Juli: Manjalo Hasasapan ni Dousa

“Domma husasap hasalahanmu songon hombun, dousamu pe songon samun, mulak ma ho hubangku, ai Ahu do sipaluah ho.”

(Jesaya 44:22)

Parlobei itujuhon Naibata hata on bani bangsani (Yahudi) na dob manundalhonsi. Sonari hu banta das hata ai. Hita pe na dob ipilih Naibata do songon bangsa Israel,ai ma sanggah na tardidi hita. Iparbagah Naibata do pasu-pasuon-Ni hita janah i ujungni boanon-Ni hita hu nagori atas. Ijia marpadan hita, mambalosi hata-Ni.

Tapi sonaha do pambalosinta? Ibalosi (iidangi) hita do Naibata? Idingat hita do padanta. Hape manggoluh hita use ibagas dousa lupa use hita bani Naibata?

Botoh hita ma anggo Naibata seng lupa banta, seng ihalupahon Naibata anak niainni ibagas pandidion na pansing in. Nini Naibata age dompak ham: “Mulak ma ho hu Bangku, ai ahu do sipaluah ho, domma husasap hasalahanmu ampa dousamu songon samun.” (terj baru: “Domma hupasisi salahmu songon hombun, anjaha songon hombun na manorap dousamu. Mulak ma ho hubangku, ai Ahu do na manobus ho.”)

Tongon do domma isasap dousamu, ra do Ia dohor bamu. Mulak ma ham hu Bani. Seng margogoh ham paluahkon dirimu. Seng tarpaluahi ham dirimu humbani dousa. Tapi daroh ni Tuhan Jesus boi papansing ham humbani sagala dousa. Roh ma ham, jalo ham ma hasasapan dousamu sibere-bere ni Naibata tumang. Ingat ham ma hata ni Naibata bamu homa: “Domma husasap hasalahanmu ampa dousamu songon samun.”

Lape itangihon ham sonari hata ni Tuhan Jesus? Roh ma ham bani Tuhanta mangkatahon: “Tongon Tuhan domma lupa ahu Bamu, tapi Ham seng ra lupa mardingat ahu. Goransi pe manggoluh ahu ibagas dousa, tong do holong atei-Mu mangidah ahu, sasap Ham ma tongon dousangku. Mulak ma ahu gabe anak-Mu lalab.”

Ulang be tulak hita idop ni uhur ni Naibata, na sonin layak mambere hasasapan ni dousanta. Mintor roh ma hita bani Tuhanta, ulang be marlambin-lambin.

Tonggo

Ham Tuhan Jesus! Tarima kasih ma Bamu, halani tong do marulak-ulakan uhurMu. tong do marontou uhurMu mangidah ahu pardousa on.

Amen.

Doding

Haleluya No 148: 1-3: Layak do Ham Mambere Au >>

1. Layak do Ham mambere au , O Jesus Tuhankin,
Ihutkon Ham daoh pe au, mambuat uhurhin.

2. Pardousa na banggal do au, pansing do anggo Ham ;
Sai bai na dorsa laho au bai na jahat naman .

3. O Tuhan, husopotkon ma ganupan dousangkin ;
Holong ma Ham, sai sasap ma, Bamu ma tonduyhin.