Jadi dob ibotoh Jesus na dob marpunsa haganupan, ase jumpah na tarsurat in, nini ma : Horahan Ahu.
(Johannes 19: 28)
“Anggo Ham itanda Ham do hahirionku, hamelaonku pakon habadoronku haganup na manosak ahu ilobeimu do. Hahirion ai do marseda uhurhu, gabe galek do ahu. Hupaima do idop ni uhur, hape seng dong, sonai age pangapoh hape seng dong, gabe pogu do ibere sidea panganon-ku anjaha bani na horahan ahu, namigar do ipainumkon bangku”. (Psalm 69: 20-22)
In ma gambaran ni sitaronon ni Tuhan Jesus bani hayu parsilang ai. Domma ipahiri Ia, domma marosak iahap angkulani. Mangkawah do Ia atap dong na maridop ni uhur, tapi seng dong na maridop ni uhur mangidahi, seng dong na mangapoh. Sihol do uhurni bani Naibata, sai ipaima ibagas pusok ni uhur. Tapi ai ma, ipaturut Naibata masa Bani halani dousanta. Namigar ma Bani ipainumkon. Horahan do Ia bani tanda roh humbani Naibata. Parah do sitaronon ai, ai paruntolon banggal hape seng dong partolongan. Horahan do la bani idop ni uhur ni Naibata, bani damei pakon hapintoron.
Halani idagei Tuhan Jesus ganupan ai, ai ma ase boi Ia manolong hita bani parlajoan, boi Ia gabe haliharon ibagas golap ni paruhuran, boi mambere damei pakon idop ni uhur. Seng pala jut uhurta, ai Tuhan Jesus tong do maidop uhurni banta, sanggah lungun uhurta, atap sanggah iahap hita itadingkon Naibata hita anjaha ilaosi jolma hita. Ingat hita ma ai anggo roh na golap hubagas uhurta bani goluh on, ai ma arihanta.
Anggo ipaturut Naibata masa sitaronon banta, na dong do ididah Naibata siharganan na porlu banta, songon na masa bani Tuhan Jesus laho paluahkon hita na porsaya.
Tonggo
Ham Tuhan Jesus! Horahan do Ham bani Naibata, horahan Ham bani na lihar. Maidop ma Ham bannami sanggah masa ni sitaronon bannami, ulang tadingkon Ham hanami.
Amen.
Doding
Haleluya No. 58: 2, 3. Sada do Hansa Sura-surangku >>
2. Ningon Ia do tongtong ingaton sanggah na tarpaku in.
Bai parsilang in igantungkon, sai madaurus daroh-Nin.
Ai mangkopkop au parah horah-Ni, ase dihut au gabe upah-Ni;
Ikawahkon do au on, ihatahon: ”Domma dob”
3. O Jesusku, pagolpa ahu bai dousangku, hu Bamu;
Sanggah bai na golap ope ahu, sai lumbang do uhur-Mu.
Ai dokah Ham mangindahi ahu, ase ulang magou au na kahou;
Ham manaron marsik in, lao manobus tonduyhin.
Recent Comments