29 September: Marmalas ni Uhur na Marianian

“Marmalas ni uhur ma nasiam tongtong ibagas Tuhan in, huulaki mangkatahon marmalas ni uhur ma nasiam.”

(Pilipi 4: 4)

Hita na dob niain ni Naibata gabe niombah-Ni pe, sai roh do banta pusok uhur, sadokah ni tanoh on hita. Tapi seng malo, seng boi marianan, tondok atap marasar pusok nu uhur ai banta. Paturut ham mamontas ai. Roh ia mintor laho use. Na marjabu ibagas uhurta maningon malas ni uhur do.

Malas ni uhur na marian-ian, seng dapot ai idarat ni Tuhan, tapi ibagas Tuhan do ai dapot. Ipindahi jolma do malas ni uhur bani na i dunia on: malas uhur bani anak pakon boru, malas uhur bani diha-diha, malas ni uhur bani duit, malas uhur bani arta, malas uhur bani pangkat pakon na legan.

Tapi haganupan ai na mubah-ubah do, na ra horlom do, na ra luntur do. Ia nahamalaskon pe ai hira songon malas ni uhur ni nabagodon (na mabuk) do hansa, bois gurgur ni bagod ai, bois ma malas ni uhur ai. Seng dapot hita malas ni uhur na tongtong i darat ni Tuhanta. Ai do ase ihatahon Apostel Paulus: Marmalas ni uhur hita ibagas Tuhan in. Porlu do pangkatahon ni Apostel ai pala ihatahon: huulaki mangkatahon marmnalas ni uhur ma nasiam.

Aha do arti ni na ibagas Tuhan? Ningon saor hita pakon Tuhan ari-ari ibagas goluhta. Ihasomani Tuhanta do hita, hasomani hita ma Tuhanta homa. Ingat hita ma hata-Ni, pambahenan-Ni, parsaoran-Ni sadokah i tanoh on Ia. Ningon iahap hita hasoman sarumah ni Naibata do hita. Anggo lobei ni Naibata seng dong pusok ni uhur malas ni uhur do hansa. Laut malas ni uhur do ilobei ni Naibata, hunjai ma bondar ham ase manjalir bamu das hubani hasoman. Anak pakon boru do ham ilobei ni Naibata, gok ni uhurmu mambuat malas ni uhur ai. Marhonong ma ham ari-ari martonggo hulobei ni Tuhanta, martonggo mangindo ase iopopkon Tuhanta ham, ase ibagas Tuhan ham. Idingdingi Tuhan ma ham. Roh pe munsuhmu lang be taridah ham. Tuhan na so tarimbang mando ididah munsuhmu.

Tonggo

Ham Tuhan Jesus! Suruh Ham ma TonduyMu bangku, ase ibohai ahu bani malas ni uhur na gok ai janah na manongtong ai.

Amen.

Doding

Haleluya No. 29: 2: Hanima na Porsaya in >>

2. Marmegah-megah uhur ma, sagala na bujur homa,
lao mangirikkon Jesus
In pe rombang patidak ma, megahmu bani Naibata
Pasaud ma harosuh-Ni
Puji, puji Jesus Kristus na manobus tonduy nima
Humbai hamagouan nima

30 September: Ra do Martorap Ham Mardalan Bani na Golap >>

<< 28 September: Marmalas ni Uhur Tongtong (1)