26 September: “Seng ra Naibata apasan”

“Ulang nasiam kahou, seng ra Naibata apasan. Tinidahkon ni manisia ai do sabioni.”

(Galatia 6: 7)

(Terj baru: “Ulang ma kahou nasiam, seng ra Naibata apasan! Ai ia in itidahkon halak, ai do sabionni”).

Aturan na so tarubah do ai, anggo itidahkon halak omei silanting omei silanting ma sabionni, anggo itidahkon omei sipulut, ai ma sabionni.

Na songon limbaga do ai. Aha itidahkon jolma hubagas uhurni ibagas goluhni, sonai ma ia matei, sonai ma ia puho. Anggo seng porsaya halak sanggah goluhni, seng porsaya ia dob matei, sonai ma ia ronsi puho, na so porsaya ma ia tong. Jadi seng tahan be bani ari paruhuman magira ai.

Tapi anggo na porsaya do ia ibagas goluhni, sonai ma ia matei na porsaya ma ia dob puho, porsaya bani pangkopkopon ni Tuhan Jesus, torus hu hagoluhan mando ai. Malas ma uhurni anggo roh ari paruhuman ai, ai ari paruhuman ni bani, ari partalar ni hagoluhanni mando ai. la paridop ni uhur ia i tanoh on, dapot idop ni uhur do ia bani ari magira ai. Anggo manggoluh ia marhasoman Naibata sanggah i dunia on, sonai ma ia ronsi matei ampa puho use Naibata ma hasomanni. Anggo ganggang do ia humbani Naibata sadokah i dunia on, ganggang ma humbani Naibata dob salpu ari uhum ai, sirang lanjar pakon Naibata (masuk hu naraka).

Uhur sipahulah-kulah ibagas parugamaon, paulah so nabahen bani ugama in, na mangapasi Naibata do ai, hampung ni uhur dompak Naibata do ai: “Seng ra Naibata apasan.” Seng marosuh Naibata asal naihut-ihut hansa ugama ai hape seng hujai uhur. ”Tinidahkon ni manisia, ai do sabionni.”

Aha do itidahkon ham hubagas uhurmu, na gabe tubuh janah martaruhup ibagas uhurmu ai? Domdom do, subil do, latei do, gijang ni uhur do, uhur haut do? Rap pakon ai ma ham hu naraka magira.

Tapi anggo holong ni uhur do, pangarapan do, haporsayaon do, holong bani Naibata do, ai ma sambatonmu holi bani ari parpuhoon magira ai bani harajaon nagoriatas ai.

Tonggo

Ham Tuhan Naibata! Urupi Ham ma hanami mangahapkon hatunggungon-Mu pakon hamuliaon-Mu, ase ulang hampung uhurnami, janah ulang mapas Bamu. Tapi sai patunggungonnami ma Ham ibagas sintong ni uhur.

Amen.

Doding

Haleluya No. 96: 3, 5: Seng Au Ompungni Ahu >>

3. Seng au ompungni ahu dob na tardidi au
bai goran ni Tuhanku na marhioui au
mardomu au bai Jesus in rap pakon Kuria-Ni
ginomgoman-Ni in

5. Sai tong hatahononku: “Seng au ompungni au”
Sai Jesus jolomanku paima ondos au
Seng lupa au bai Jesus in ronsi rotap hosahku
Sai sonang au ijin

27 September: “Sada do hansa na porlu”>>

<< 25 September: Roh Mulak Hubani Bapa

tnt190926