“Nape jumpah panorang-Ku”.
(Johanes 2: 4b)
Bani pesta parunjukon na i huta Kana do tarbogei hata in iluarhon Tuhan Jesus bani si Maria. Ibotoh hita do dob ni isalihkon Tuhan Jesus do ijai bah gabe anggur, halani hurangan anggur sidea.
Hunjai ididah hita, sedo pitah haru ni uhur na banggal hansa ibastu Tuhan Jesus hita manisia, age haru na otik hasunsahan ra do Ia roh bani na marpiosi, janah ra do la mangurupi hita.
Pandapot na sonai ai ma mangojur hita roh bani Tuhan Jesus age sadihari, ia haboratan aha pe roh banta na banggal atap na etek. Sedo pitah pasal dousanta ase roh hita bani Tuhanta, age haboratan na otik pe sahapkon (tonggohon) hita hubani Tuhanta.
Halak na i huta Kana ai, malas tumang uhur ni sidea dob itolong Tuhan Jesus sidea. Partolongan ni Tuhan Jesus pe mantinan do ai marimbang partolongan ni na legan atap partolongan ni diha-diha, songon anggur na i huta Kana ai “mantinan”.
Dong do tujuan ni Tuhan Jesus anggo itolongi hita ase porsaya hita, songon susian ni Tuhan Jesus ai. Anggo ibilangi ham partolongan ni Tuhanta bamu, lang tarbahen lang tubuh lambin totap do haporsayaonmu. Tong do Tuhan Jesus songon ijia, sonai do sondahan on sonai do hunjon hujanan ronsi sadokah ni dokahni. Ra do Ia tong roh bani na marpiosi janah ra do Ia mangurupi sidea.
Tapi dong sada sidingaton: Ra do homa ihatahon banta songon hatani dompak si Maria ai: “Nape jumpah panorangku!” Anggo sonai tiruonta ma si Maria na sabar paimahon panorang ni Tuhanta, anjaha sirsir hita mandalankon hata-Ni songon na marugas ai. Tapi ulang panorangta sungkunon, panorang ni Tuhanta do, ai botohan do la pasal na porlu banta.
Tonggo
Tarima kasih ma bamu Tuhan Jesus, halani ra do Ham diloonnami anjaha ra do ham mangurupi hanami bani hahurangannami na sinuhutkonnami Bamu. Amen.
Doding
Haleluya No. 154 :1-3. Marsipota pe Idahon >>
1. Marsipota pe idahon, hita songon tinadingkon
Ni Tuhanta Bapa in, sedo na tongon sonin2. ‘Ge malambat pe sipota pangurupi ni Tuhanta,
anggo roh panorangnin, mintor tongoson-Ni in.3. Songon pambere ni Bapa do pambere ni Tuhanta,
na marguna dansa tong iberehon banta on.
Recent Comments