“Holong ni uhur ni Kristus do manjuljul hanami”.
(2 Korintus 5:14)
Domma iahapkon ham holong ni Tuhan Jesus bamu? Domma iguruhon ham sonaha holong ni atei-Ni bamu, pala matei Ia mangkopkop ham, ase manggoluh ham? Domma ipungkah ham mangkaholongi Jesus tembal ni holong-Ni bamu?
Papangkei hita ma goluhta ari-ari: aima do isi ni hatanta pakon parlahouta. Ipareksa orangtua ma pardomuanni pakon niombahni. Tarahap do bani niombahmu na holong uhurmu bani Tuhan Jesus? Ipatorang ham do bani niombahmu holong ni uhur ni Tuhan Jesus bani dakdanak. Halani holong ni Naibata do ase patut haholongan ni dakdanak namatorasni.
Ia ija pe ham janah atap aha pe horjamu, sada do na porlu, ase iahap ham holong ni atei ni Kristus janah marhitei ham ase tarahap bani na legan holong ni Kristus marhitei ham. Holongmu bani Kristus pakon bani kuriaNi do sada na patandahon ai.
Pangahapmu bani banggal ni dousamu, hape isasap Tuhan Jesus, ijai ma naahap banggal ni holong-Ni ai. Pangahap bani banggal ni holong ni Tuhanta do manjuljul hita roh Bani mangkaholongi-Si pakon kuria-Ni. Hurangni iahap hita holongni ai do mambahen hurang holong ni uhurta bani Tuhanta pakon bani harajaon-Ni.
Apostel Paulus domma iahap banggal ni holong ni Kristus bani pakon bani bangsani ronsi bani ganup jolma, ai do manjuljulsi marhorja ibagas harajaon ni Naibata, marhorja ibagas malas ni uhur.
Tonggo
Ham Tuhan Naibata! Suruh Ham ma Tonduymu bangku, ase tangkas huahapkon holong ni ateiMu bangku pakon bani jolma manisia ganupan.
Amen.
Haleluya No. 133: 1,9,11: Holong do Atei
1. Holong do atei ni Naibatangku
parholong atei mangidah au.
Ai ipasirsir do haluahonku
marhitei Jesus Anak-Ni in.9. Ai ipamalum haholongon-Ni
ganupan sahitni uhurhon.
Ai do ‘se ningku tong:
Holong do atei ni Naibatangku mangidah au.11. Sai teanonku do hasonangan,
ronsi sadokah-dokahni in.
Ai do ‘se ningku tong:
Holong do atei ni Naibatangku mangidah au.
Recent Comments