“Domma puho Ia (Jesus)”.
(Lukas 24 : 6)
Domma puho Tuhan Jesus humbani hamatean. Puho Ia ase ibere banta hagoluhan. Domma ipindouhon ham ase ibere bamu uhur nabayu? Domma itonggohon ham ase ibere bamu goluh-Ni na marhagogohon ai, janah mardalan ibagas haporsayaon, boi mangimbang dousa pakon sagala hajahaton.
Anggo ihatahon ham sonai na mamungkah tubuh do ibagas uhurmu jolma na bayu ai, goluh na bayu na marsaor pakon Naibata, janah margogoh ma ham marhitei gogoh na humbani Naibata.
Tapi ra do lang ongga bagas ipingkiri ham pasal Naibata, sonai age pasal Tonduyni. Laho do ham hu gareja songon na legan, tapi sedo na masihol ham bani Naibata. Atap seng dong sura-suramu mamoluhon Sipaluah in. Atap seng porlu bamu na mangindo uhur na bayu. Tapi ingat ham ma: Seng lanjar manggoluh, ningon matei do. Huhatahon ma bamu marhitei goran ni na dob puho ai: Domma puho Jesus humbani na matei ase boi ibere bamu hagoluhan.
Holong do atei-Ni bamu, ra do Ia marsuruh Tonduyni bamu, sihol bahenon-Ni do ham anak ni Naibata na ginokan ni malas ni uhur. Ai manggoluh do Ia, malas do uhur-Ni anggo manggoluh ham bani Naibata, rapkon Naibata.
Jadi sonaha, nape ra ham marpingkir pasal Tuhan na manggoluh ai. Pindo ham ma hu Bani ase ibere bamu uhur na baru. Itangihon do tonggomu.
Tonggo
Ham Tuhan Jesus! Domma puho Ham use, domma manggoluh Ham. Bere Ham ma bannami deba humbani goluh-Mu ai. Domma puho Ham, sai papuho Ham ma uhumami dompak Ham. Papuho Ham uhurnami dompak goluh magira ai.
Amen.
Doding
Haleluya No. 72 : 1.2: Jesus Hatengerankin
1. Jesus hatengerankin, ham do Tuhan na manggoluh.
In hubotoh, halanin, hupasabou ma uhurhu.
’Ge tarsosak uhurhin mangkirahon ajalhin.2. Jesus Sipagoluh au, domma puho o tonduyhu.
Ho magira ningon lao bai ianan ni Tuhanmu.
Tor tartading baenon ni ulu ni pagori-Nin?
Recent Comments