“Halani idop ni uhur do ase maluah nasiam marhiteion haporsayaon, sedo binahen nasiam, sibere-bere ni Naibata do, sedo humbani horjamu, ase ulang dong na mamuji diri.”
(Epesus 2: 8, 9)
Sagala arta na dapot itanoh on, na niombou (na sinari) do ase dong. Hunjai ma roh ni pingkiran deba na dapot ombouon ninuhur ni halak pakon arta partonduyon.
Hira haganup ugama do mangunsagahon parombou ase masuk hu surga (hu hasonangan). Pingkiran na sonai do deba roh bani halak Kristen.
Bani ugama Kristen seng sonai, sibere-bere ni Naibata do. Porlu torang banta: Anggo haluahonta domma ipasirsir Naibata marhitei pangkopkopon ni Tuhan Jesus Kristus.
Na porlu bani hita na sihol maluah, ai ma na mangkaporsayai ai, ai do. Mangauhon hapintoron na binahen ni Tuhan Jesus dihut ma ai gabe hapintoronta, ai do hansa.
Ia haporsayaon ai, na songon tangan manjalo do hansa ai bani haluahon ai na dob tinagang ni Naibata halani Idop ni uhur-Ni.
Haporsayaon ai pe anggo iahap ham paromboumu do ai homa, lepak do. Sagala horja na madear na hinorjahon ni halak Kristen, na songon banggal ni uhurni do ai bani haluahon na binahen ni Naibata. Buah ni haluahon na binere ni Naibata do ai.
Tangkas do ionjolhon hata na iatas in: “Sedo humbani horjamu, sedo binahen nasiam, sibere-bere ni Naibata do”. Jadi domma itagang, Jesus banta haluahon humbani dousa pakon haluahon humbani kuasa ni sibolis marhitei parmatei-Ni. Sai tenger ma uhurta pasal ai.
Ai ma homa pahinsah uhurta roh bani Tuhanta mangindo haluahon humbani sagala na manangkut hita dunia on, songon uhur haut, gijang ni uhur, subil, latei, pnl. tapi ipaluah ma hita humbani ganupan ai.
Humbani haganup hauhuron na hurang, na mangkasangkut bani dunia on, ham do mambotoh atap hauhuron naija na manangkut ham. Humbani ganup uhur dunia on pe tarpaluah Tuhan Jesus do hita. Sonai homa humbani haporsayaon na mangkahaut bani uti-utian sapari atap uti-utian sondahan on. Asal ipindo hita ra do Tuhanta hita hunjai.
Tonggo
Ham Tuhan Naibata! Urupi Ham ma hanami ase porsaya botul hanami bani haluahon binahen ni Tuhan Jesus sonai ampa hasasapan ni dousanami marhitei daroh ni Tuhan Jesus Kristus.
Amen.
Doding
Haleluya No. 147: 1, 2, 4: Ham Naibata banggal tumang >>
1. Ham Naibata banggal tumang, janah borat dousangku,
Seng dong ijon itanoh on, tarbaen haporusanku.
2. ‘Ge pe huja au laho da mangalop hatuahon,
Seng dapot in bai tanoh in. bai ganup hajolmaon.
4. Ai daroh-Mu na harga in, Jesus baen pardearan;
Sahei ijin do utangkin bai hayu na marsilang,
Recent Comments