21 September: “Ulang mulak bani haotoon”

tnt_sep21_god speak

“Ai hadameon do hata-Ni dompak bangsa-Ni ampa dompak niidopan-Ni tapi ulang mulak be sidea bani haotoon.”

(Psalmen 85: 9)

(Terj baru: “Ai hadameion do hata-Ni dompak bangsa-Ni pakon bani na hinaholongan-Ni, asal ma ulang mulak sidea bani haotoon”).

Martorap ra do (hita) anak ni Naibata mulak bani haotoon, talu ibahen hajahaton. Anggo sonai idilo Naibata ma ia use mulak humbani dalan-Ni. Ra do ai masa marhitei naborit na parah roh, atap marhitei sitaronon na legan pe. Naibata do hasomanmu ia tibal pe ham i podoman. Sanggah ijai boi iahap ham dousamu ampa sagala hahuranganmu. Hasasapan ni dousa marhitei idop ni uhur ni Naibata mando ase boi ham mulak mardamei pakon Naibata.

Ra ham do sada na dob iparsahapkon Naibata sanggah boritan janah malum iahap ham, janah mulak gogohmu mangkorjahon horjamu ari-ari. Jaga ham ma ase ulang mulak ham bani haotoon. Dingat ham ma bagah-bagahmu sanggah boritan ondi: Anggo iurupi Naibata ahu santorap on hutadingkon ma dalanku na lepak in, ningon margoluh Kristen ma ahu.

Anggo isuhuni ham bagah-bagahmu ai, sai hasomanan ni Naibata ma ham, urupanni do ham ase tong mardamei. Patotaponni janah pargogohan-Ni ma ham mandompakkon na jahat janah pamonangon-Ni ham.

Lupa pe ham bani Naibata, anggo Ia seng lupa mardingat ham. Basa ham ma hata ni Naibata ari-ari bamu. Sai pajumpah ma ham pakon Naibata ibagas tonggomu, sipsip ma ham homa ilobei ni Naibata, tangihon ham ma sora-Ni. Domma ipungkah horja na madear ibagas dirimu, sai dobkononni do ai, ase gabe totap ham Bani.

Domma iondoskon holongni bamu, halani ai idangi ham ma Ia ibagas holong, bani pargoluhonmu ari-ari. Ingat ham ma: Dob tardidi ham domma masuk ham gabe bangsa niidopan ni Naibata, jadi hata hadameon do hata-Ni dompak bangsa-Ni, dompak ham.

Tapi pangindoan ni Naibata banta: Ulang mulak hita maoto mangulaki dalan sapari. Tapi dalan ni Tuhan Jesus Kristus ma irikkon hita. Lamlam do Naibata dompak hita pardousa. Tapi pangindoan-Ni, ulang mulak maoto hita mangulaki abak sapari ai.

Tonggo

Ham Tuhan Naibata! Ipamalum Ham do naborit ni angkulangku ampa, naborit ni tonduyhu. Urupi Ham ma ahu ase ulang be huulaki dalan lama ai. Urupi Ham ma ahu ase malas uhurhu mambalosi pakon mangidangi Ham.

Amen.

Doding

Haleluya No. 19 :1, 2: Damei do Nimu Bereon >>

1. Damei do nimu bereon, Jesus bani bangsa-Mu,
Tonduy-Mu do pasaudkon, hata bai jabolon-Mu,
Na doyuk janah masombuh, au seng patut rongkon Ham
Tonduy Na Pansing ma suruh ‘se gogoh manombah Ham.

2. Ale Tonduy Sipardamei sai masuki hanai on.
Sai pasada uhurnami, ‘se marbuah ganup on.
Sai tangima pinggol nami lao manangar ojur-Mu;
Ase tambah ringgas nami pararatkon hata- Mu.

22 September: “…sedo Jahowa ipindahi, rahanan do panambari” >>

<< 20 September: Hajorgiton ni Tonduy

tnt160921