Ulang surut hinsah ni uhur nasiam, partonduy na hinsah ma nasiam! Balosi nasiam ma Tuhan in.
(Roma 12: 11)
Iahap hita do anggo martorap hinsah do uhurta, malas do uhurta mandalankon parugamaonta. Tapi martorap galek do uhurta.
Ipindo hata ni Naibata, ulang surut ringgas ni uhurta, ulang martorap hansa ringgas uhurta, ningon manongtong do halak na marsarunei torus do manompul sadokah mardalan ope gual na sapahara ai. Manompul do is tong, tahan do dokah, mase? Sanggah manompul pe ia ionsop do use hosah sisompulonkon use (manguntong). Jadi boi torus marsarunei, seng surut hosah isompulhon. Tapi seng naidah masuk hosah ai hubagas huyumni, humbani igungni do (suali) masuk hosah ai sedo humbani pamanganni.
Jadi ulang surut hinsah ni uhurta, ulang surut ringgas ni uhurta, ingat hita ma mangalop gogoh bani Tuhanta marhitei hatani pakon tonggonta, ase tongtong iparinggas uhurta ipahinsah uhurta homa age tonduyta.
Mangaha do porlu ipahinsah uhurta, iparinggas tonduyta? Laho mambalosi Tuhan in laho mangidangi Tuhan in, laho mangidangi horja ibagas harajaon ni Naibata, mangidangi horja ibagas Kuria ni Tuhan Jesus. Malas ni uhur ampa hinsah ni uhur Kristen, ai ma sada na so iarti dunia on. Pingkir ham: Mase ma malas uhurta anggo dong porini tubuh sada kuria, malas uhurta anggo dong buei masuk Kristen atap i huta ja pe. Halak ai sedo diha-diha diri. Tapi malas ni uhur sisonai ai gati marhanjar-honjur.
Ai ma pinagolpa ni hata na iatas on ase tong totap, ulang surut ringgas ni uhur ai, tapi ase manongtong. Ai tujuan ni ugamanta hatongtongon do, sisadokah ni dokahni do.
Tonggo
Ham Tuhan Jesus! Bere Ham ma bangku Tonduymu na Pansing in ase ipatongtong janah ipahinsah uhurhu laho mangidangi Ham. Amen.
Doding
Haleluya No. 120: 1, 5, 7 Sai Hinsah Sai Gogoh >>
1. Sai hinsah, sai gogoh, sai hinsah mardalan ho.
Sion hu nagori atas, tongkin pe ho ulang soh.
Suluhmin baen marsinalsal! Bai na lihar in mardalan ho.
Sai hinsah, sai gogoh.5. Torus baen, torus baen, Sion torus uhurmu.
Mamingkiri hasonangan binahen ni Naibata.
Sai simbili hamagouan, Sion sai timbangi dalanmin.
Torus baen, torus baen.7. Golom ma, golom ma, Sion golom bujurmin.
Sai tongtong ma ho margogoh lao mangimbang munsuhmin.
Seng daoh be ho hun surga, asal monang bai ujungni in.
Bujurmin, golom in!
Recent Comments