21 April: Margoling pusok ni uhur gabe malas ni uhur

tnt_april21_emmaus
Dua susean mulak hun Emmaus hu Jerusalem: “Ai lang gara do uhurta ibagas, sanggah na pinarsahapkon-Ni ai hita ….? – Luk 24:21

“Jadi igogohkon sidea ma hu Bani, nini ma: rapma hita namin, ai malele bod ma anjaha manabad ma mata ni ari jadi masuk ma Ia rap pakon sidea”.

(Lukas 24 :29)

Na namardalan do Tuhan Jesus rap pakon susian na laho hu huta Emmaus. Dob rap mangan sidea, tarbuka ma panonggor ni sidea, laho mananda Tuhan Jesus. Margoling ma pusok ni uhur ni sidea gabe malas ni uhur.

Atap malele bod ma goluhmu, atap mahabad ma mata ni ari ni goluhmu. Na porlu banta ari-ari ase rap hita pakon Tuhan Jesus. Anggo sintong do ham susian ni Tuhan Jesus, ra do Ia mangkasomani ham. Anggo rap Tuhanta pakon ham, margoling do pusok ni uhurmu gabe malas ni uhur. Lang be sahalak ham bani panorang pusok ni uhur. Sanggah lang dong na legan na marsahapkon ham, sai Tuhanta ma hasomanmu marsahapi. Ningon tenger uhurmu seng ipaturut Tuhanta ham lungunan ibagas pusok ni uhurmu. Do do Ia hu bamu. Itangihon do elek-elekmu. LuaronkonNi do hata damei bani uhurmu. Ia domma matei Iobei, ra do Ia mangkasomani hita ronsi matei.

Luaronkononta ma humbani gok ni uhurta: Porsaya do ahu Ham do Sipaluah ahu. Na ra do Ham mangkasomani ahu tongtong. Sedo namin na patut ahu susian-Mu, tapi porsaya do ahu na dob igalar Ham utang dousangku. Hubotoh do torang na holong do uhur-Mu bangku.

Seng ipaturut Tuhan Jesus bungbang uhur ni susianni na laho hu huta Emmaus ai. Hita pe seng anjai ipaturut Tuhanta bungbang hita, tolohan-Ni do hita, parsahaponkonni do hita, buhaanni uhurta, ase torang banta partuhan na manggoluh do hita.

Tonggo

Ham Tuhan Jesus! Tarima kasih ma Bamu, ai ra do Ham mangkasomani ahu ibagas sagala pakon pusok ni uhurhu ronsi matei ahu. Janah i ujungni boanMu ma ahu hagoluhan pakon hasonangan na dob pinasirsirMu bani sagala na porsaya Bamu.

Amen.

Doding

Haleluya No. 137 :1 – 3: Sadokah Jesuskin

1. Sadokah Jesuskin mangkasomani au
Maporus holsoh-holsohkin, sai Bani mando au

2. Parmahan Jesuskin, biri-birini au
Itogu-togu tonduyhin, seng be marmara au

3. Sai ipatudu au, bai hasonangan in
Iiring-iring Jesus au, mardalan laho hujin

22 April: Sai sihol paluahon-Ni do hita humbani pusok ni uhurta >>

<< 20 April: “Domma puho Ia”