“Tapi laho ma nasiam, patugah nasiam ma bani susianni pakon bani si Petrus, lobeianni do nasiam hu Galilea. Ijai ma idahon nasiam ia songon na dob hinatahonni bani nasiam”.
(Markus 16: 7)
Borat tumang do bani susian ni Tuhan Jesus dob matei janah tartanom Tuhan Jesus. Si Petrus pe tang siboratanni, ai dob iporsou Tuhan Jesus, lanjar ma lang marjumpah sidea ronsi sirang matei. Seng tarhalupahonsi pangkawah ni Tuhan Jesus dompaksi ibagas pusok ni uhur, na i rumah ni Sintua ni Malim ondi.Manungkun do tong ibagas uhurni: Lang be nani isasap Tuhan Jesus dousangku? Tangis sosombopon do ia manangiskon dousani ai.
Tapi tarapoh do si Petrus dob das tonah ni malekat ai na mangkatahon: “Laho ma nasiam patugah nasiam ma bani susianni pakon bani si Petrus. Lobeanni do nasiam hu Galilea, ijai ma idahon nasiam Ia, songon na dob hinatahonNi bani nasiam”. Lang tarhatahon be malas ni uhur-Ni dob das bani tonah ai: “Idingat Jesus ope ahu hape” nini uhurni ibagas ai igoran pala goranni sandiri. Itonahkon homa ase idahonni sidea Ia use, holong ma tongon uhurni bani susianni.
Ibagas tonah ni Tuhan Jesus ai dihut do hita tarapoh. Ibotoh Tuhanta do pusok ni uhur na roh hu banta, songon na bani si Petrus, age sanggah mardousa hita tongtong do idingat, sai sihol paluahon-Ni do hita humbani pusok ni uhurta. Ulang mabiar ham lang iurupi Tuhanta, holong do ateini bamu, ingat ham ma ai.
Halani ai ulang biaran Ham mangindo hu Bani. Martonggo ma ham, idahonmu do Sipaluah ham.
Tonggo
Ham Tuhan Jesus! Idingat Ham do hanami na mardousa on. lbotoh hanami holong do uhurmu bennami. Tarima kasih ma Tuhan halani ihargahon Ham do hanami songon orbuk. on.
Amen.
Doding
Haleluya No. 148 :1-3: Layak do Ham Mambere Au
1. Layak do Ham mambere au , O Jesus Tuhankin,
Ihutkon Ham daoh pe au, mambuat uhurhin.2. Pardousa na banggal do au, pansing do anggo Ham ;
Sai bai na dorsa laho au bai na jahat naman .3. O Tuhan, husopotkon ma ganupan dousangkin ;
Holong ma Ham, sai sasap ma, Bamu ma tonduyhin.
Recent Comments