20 September: Hajorgiton ni Tonduy

tnt_sep20_naboritnitonduy

Dob ibotoh Jesus ia tibal anjaha ibotoh pala sonai dokahni ia ijai, gabe nini ma dompaksi: sihol malum ham?

(Johanes 5: 6)

Anggo boritan hita, sai dompak naboritta do laho uhurta. Manungkun do hita ibagas uhurta: Boi do nani ahu malum? Naayaki do jururawat atap doktor pe.

Tapi dong ope naborit siparahan, ai ma naborit ni tonduyta, parahan do ai ase naborit ni angkulanta. Domma iahap ham naborit ni tonduymu? Domma marpingkir ham atap sonaha dalan pamalumkonsi?

Buei do halak otik do hansa atap sabonar seng dong pamingkirionni pasal tonduyni. Mabiar do halak laho matei. Tapi seng ihabiari atap na laho matei ma tonduyni. Sonaha do ham? Porlu do maruhur ham, ningon lobih namin pansarihonmu bani tonduymu ase pamatangmu pasal hajorgitonni.

Naborit ni angkulanta napapareksahon do bani doktor, sonaha ia naborit ni tonduymu? Naborit ni tonduyta mamboan hu hamatean sadokah ni dokahni. Halani ai papareksahon ham ma bani Tuhan Jesus. Tuhanta pe manungkun bamu songon na boritan na i Bethesda ai: “Sihol malum ham?” Boi do Tuhan Jesus pamalum naborit tonduymu, asal ma ipatugah ham janah ipindo ham na sihol malum ham. Anggo naboritan na i Bethesda ai iahap do seng tuk gogohni mangayaki hamalumon.

Na bajan anggo lang iahap hita naborit ni tonduyta. Halak na gadamon gan seng sai iahap naboritni, age mangkatektek ma sasamponggol jari-jarini. Pasal ai hubani doktor Tonduy do hita porlu roh, ai ma Tuhan Jesus, ase ipamalum hita. Ai do na porlu. Pangahapan pasai hajorgiton ni tonduyta, hajorgiton ni uhurta, ampa sihol ni uhur bani hamalumon ai, ai do na porlu bani Tuhanta. Ambah ni ai tenger ni uhur bani gogoh ni Tuhan Jesus, pamalum tonduyta, ai do iparsinta Tuhanta humbanta.

Tonggo

Ham Tuhan Jesus! Gatian do ipingkiri hanami pasal hajorgitan ni pamatangnami, tapi lupa do hanami mansarihon hajorgiton ni tonduynami siharganan ai. Urupi Ham ma hanami ase marpingkir hanami pasal naborit atap hajorgiton ni tonduynami. Ase roh hanami hu Bamu mangindo hamalumon.

Amen.

Doding

Haleluya No. 134: 1, 2: Ambit Lang Ham Rupeihu ale Jesus >>

1. Ambit lang Ham rupeihu ale Jesus,
jaha daroh-Mu manghakui ahu
mintor huja ma ahu na mardousa, marhaporusan.

2. Ai seng be dong na songon Ham Tuhanku,
na parlunggarhon pusok ni uhurhu;
Sahalak Ham do sipasonang ahu, hagoluhanku.

21 September: “Ulang mulak bani haotoon” >>

<< 19 September: Anggo iahap hita habanggalon ni Naibata

tnt190920