Sanggah ijia ma roh Jesus hun Galilea hu Bah Jordan laho padidihon dirini hubani si Johannes.
(Mateus 3:13)
Tuhan Jesus na susi in mangindo pandidion. Ia sedo na ongga dais dousa Bani, ipindo pandidion hamubahon ni uhur, laho pasasapkon dousa. Ai do arti ni pandidion ni si Johannes nini.
Mase ibahen pangindoan ai? Na roh do Jesus hu dunia on mangauhon dousanta pakon hasalahanta. Ia do Anak ni ni Naibata na mamorsan dousa ni dunia on. Sihol tarononni do sitaronon ni hita pardousa.
Torang do ai ididah nabi Jesaya sanggah ihatahon: “Tongon do sagala naborita ilanja janah hadoyukonta iporsan. Halani panlanggaronta tarpantom Ia, binahen ni hajahatonta ugahan Ia. Tampei hu hubani do pinsang-pinsang parhitean ni hasonanganta janah binahen ni ugahni malum lahap hita” (Jes. 53:4, 5).
Pasal ai ganupan domma ibotoh Tuhan Jesus hinan. Ipungkah ma ai humbani na tardidi songon pardousa. Tarononni ma haganupan ase boi maluah jolma. Idalankon do ai haganupan jinuljul ni holong ni uhumi bani hita pardousa.
Sonaha do uhurta manjalo holong na sonai banggalni? Na mahol, ai ma pangantusion pakon panandaon bani holong ai: “Ai sonon do parholong ni atei ni Naibata bani dunia on, pala do anakni sisada-sada ai iberehon, ase ulang magou sagala na porsaya Bani, tapi ase dapotan hagoluhan sadokah ni dokahni“.
Tonduy ni Naibata do na boi patorangkon ai banta. Halani ai pindoonta ma ase roh Tonduy na Pansing patorangkon ai banta. Ase iarusi hita sonaha banggalni, sonaha bagasni holong ni atei ni Naibata bani dunia on pakon banta.
Tonggo
Ham Tuhan Naibata! Ibagahkon Ham do, ra do Ham marsuruh Tonduymu bani na ra mangindo. Suruh Ham ma Tonduymu ai patorangkon bannamibanggal ni holong ni ateimu bannami pardousa.
Amen.
Doding
Haleluya No. 133: 1,5 Holong do Atei >>
1. Holong do atei ni Naibatangku
parholong atei mangidah au.
Ai ipasirsir do haluahonku
marhitei Jesus Anak-Ni in.
5. Itaron Jesus do hamateian,
manggalar utang ni dousangkin.
Ai do ‘se ningku tong:
Holong do atei ni Naibatangku mangidah au.
3 Maret : Mase seng ididah uhurta holong ni atei ni Naibata banta? >>
<< 1 Maret: Sinjata Mandoppakon Parlajouan pakon Dousa
Recent Comments