Tapi anggo na bani tanoh na madear, in ma na manimpan hata binogeini ai ibagas uhurni, na bonar anjaha na madear gabe saud ma marbuah ibagas sabar ni uhur.
(Lukas 8: 15)
Hunja ma dapot hita uhur na bonar anjaha na madear ai – uhur na boi manjalo hata ni Naibata?
Humbani Naibata do dapot uhur na sonai ai. Pindoonta ma bani tonggonta: “Tuhan urupi Ham ma ahu, ase huparimbagaskon Hatamu”. Jadi dong ma kamar ni hata ni Naibata ibagas uhurta. Jadi anggo roh parlajoan banta, mintor idingat hita ma hata ni Naibata. Tiruanni porini: “Tenger ma uhurnima anjaha totap, ulang mabiar, ulang hitir uhurnima dompak sidea, ai Jahowa Naibatamu sandiri hasomanmu mardalan, seng anjai paturutonni ho atap tadingonkonni ho”. (5 Musa 31:6).
Hata ni Naibata ma sinjatanta bani sagala parlajoan pakon dompak sagala dousa. Ia sanggah dong sunsah ni uhur atap pusok ni uhur pasal hahurangan bani goluh on (sipanganon, parhiouon pnl.), roh ma bani pardingatan bagah-bagah ni Naibata na mangkatahon: “Ulang haru uhur nasiam mangkirahon age aha, tapi pabotohkon nasiam ma bani Naibata pangindoan nasiam marhasoman tonggo pakon pangindoan marhasoman tarima kasih”. (Pil. 4: 6). Mintor bani Naibata ma hita laho simada hagogohon i nagoriatas pakon i tanoh on.
Atap sai laho uhurmu dompak duit, atap ai tong manggoki uhurmu, ingat ham ma hata ni Tuhan Jesus, seng tarbalosi arta rap pakon Naibata.
Anggo dokah paruntolonta, lalab lang randang, ingatonta ma hata on: “Sai bujur ma ho ronsi matei dob ai bereonku ma hu bamu sortali hagoluhan ai”. (Pang 2:10).
Tonggo
Ham Tuhan Naibata, sai siat anjaha ijolom uhurhu ma Hatamu ai ma sinjatangku ibagas goluh on.
Amen.
Doding
Haleluya No. 138: 3, 4. Jahowa Naibatanta Do >>
3. Gok pe habiar tanoh on, laho mandorab hita.
Ulang mabiar hita on, ai ningon monang hita.
Age manggila pe, sibolis banta bei,
seng habiaran be; Ai ‘ge sa hata pe,
kuh do manaluhonsi.
4. Ai Hata ni Jahowa in na dong tarkahuasi;
Tuhanta do sijaga in, ambah ni jabolon-Ni.
Hosahta, arta pe, na dong in banta pe,
iayob munsuh in, uhumi ma hujin,
Tuhanta hasomanta!
Recent Comments