“Maetektu do ahu namin manjalo sagala idop ni uhur-Mu ampa ganup hasintongan na binahen-Mu bani juak-juak-Mu on, paluah Ham ma ahu hun tangan ni abangku ai, mabiar do ahu bani.”
(1 Musa 32: 10, 11)
Domma mardousa si Jakob dompak titah haholongon ai. Hira irampas do pasu-pasu bagian ni abangni si Esau hinan humbani bapani na matua in, na so marpangidah be. Ipahulah si Jakob do ia songon si Esau. Halani ai ma ase lintun ia hu nagori na legan songon na tarbuang.
Domma ihatahon Naibata ase mulak ia use hu nagorini hinan. Dob das barita ai bani si Esau on do hatani: Roh ma ia mangalo-alo si Jakob pakon hasomanni 400 halak. Biar tumang ma si Jakob, manrogop ma ia hubani Naibata martonggo. Ibalosi Naibata do pangindoanni, ipalamlam do uhur ni si Esau mangidah si Jakob. Roh do ia tongon mangalo-alo tapi sedo marmunsuh, gabe marsummah do sidea.
Buei do boi parlajaranta humbani barita on. Ai lang gati do hita manlanggar bani titah holong ai? Ai lang sai sihol buatonta do laba humbani saninanta? Lupa do hita mamingkirhon hasonangan ni saninanta; ai lang gati na paet ibahen hita dompak saninanta? Atap gabe mangapasi Naibata do saninanta halani ilanggar hita titah holong ai.
Songon si Jakob: Na so talup do hita namin manjalo idop ni uhur ni Naibata, halani buei pakon banggal ni dousanta. Tapi iurupi Naibata do hita ipasu-pasu horjanta. Lang patut be namin sonai bahenonni Naibata banta halani dousanta. Holong ni atei ni Naibata do hansa ai, ai ma ase patut hita homa marholong.
Anggo iahap hita habanggalon ni Naibata, sonai homa haetekonta, tongon do songon hatani si Jakob ai, maetektu do hita namin manjalo sagala idop ni uhur ni Naibata.
Tonggo
Ham Tuhan Naibata, Bapanami ni i nagoriatas: Maidop ma uhurMu bannami bahen Ham ma hanami bujur, pintor holong dompak hasomannami.
Amen.
Doding
Haleluya No. 200: 1: Aha ma Dodingkononku >>
1. Aha ma dodingkononku ase pujionku Ham.
Ale Tuhan Naibatangku Ham ma mangurupi au.
Seng na tarpajojor ahu holong-Mu tongtong hu bangku.
Halaniin hupuji do ham marribu hali lo.
Recent Comments