“Laho ma ham humbangku Tuhan, ai halak pardousa do ahu.”
(Lukas 5: 8)
Anggo sanggah iahap hita hagogohon, hatunggungon pakon hamuliaon ni Naibata hu banta, mintor iahap hita do haetekonta, habutakonta, na so patut manjalo idop ni uhur ni Naibata.
Sonai ma pangahap ni Apostel Petrus ijia dob dapot jalani (dotonni) buei tumang nidurung (ihan) marhitei hata ni Tuhan Jesus. Sonai homa pangahap ni komandan na mangindo malum juak-juakni, na mangindo tolong bani Tuhan Jesus, ibagahkon Tuhan Jesus do roh pe ia pamalumkon. Ibagas toruh ni uhur ibaloskon ma: “Seng talup dogeonmu rumahku”.
Sonai do pangahap ni halak anggo domma iahap hapansingon ni Naibata ampa habutakonni pakon dousani, seng talup ia iahap dohor bani Tuhan na pansing in. Jadi anggo seng dong na legan na boi mangurupi hita sobali Tuhan na pansing in, sonaha ma? Tapi ingat ham ma: Ia Naibata. Naibata ni haholongon do na mangkaholongi anak ni manisia.
Ididah hita do sonaha Tuhan Jesus patorangkon uhur ni Naibata dompak hita. Seng misir Tuhan Jesus hun lambung ni si Petrus pardousa ai, ipilih do ia gabe susianni, ipilih do ia gabe siparugas bani.
Songon uhur ni Tuhan Jesus dompak si Petrus, sonai do uhur ni Naibata dompak hita ganupan. Ididah do dousanta do na manirang hita humbani Naibata, tapi sihol bahenonni do hita pardousa on gabe susianni, gabe siparugas Bani, tapi maningon iparhatongon hita: “Tuhan, halak pardousa do ahu”. Roh ma balosni: Hupaluah pe ho, huurasi pe ho humbani dousamu.
Hita pe mangkatahon tarima kasih ma bani Tuhanta, halani ra Ia manjalo hita pardousa na madursat on gabe siparugas ibagas harajaon-Ni.
Mananda dousa diri, mananda hahurangan diri, ai ma sada hauhuron na payah parlajaran. Anggo mananda hasurungan diri urah do ai, halani hasoman gijang ni uhur do hita ibahen sibolis. Tapi mananda hahurangan diri, payah tumang do ai. Ai ma hauhuron sitinggian, seng piga halak na das hujai pambotohni. Maningon Naibata do mangurupi hita ijai.
Tonggo
Ham Tuhan Jesus! Halak padousa banggal do ahu, na pansing do Ham. Maidop do uhunnu bani pardousa, jalo Ham ma ahu hubagas harajaonmu.
Amen.
Doding
Haleluya No. 148: 2, 3, 5: Layak do Ham Mambere Au >>
2. Pardousa na banggal do au, pansing do anggo Ham;
Sai bai na dorsa laho au bai na jahat naman.
3. O Tuhan, husopotkon ma ganupan dousangkin;
Holong ma Ham, sai sasap ma, Bamu ma tonduyhin.
5. Ai domma pala matei Ham, mangkopkop tonduyhin;
Sihol ma au mangidah Ham, hu lambung-Mu ijin.
20 Juli: “Seng Dong Sibahen na Madear” >>
<< 18 Juli: Goluh na Romban bani Podah
tnt160719
Recent Comments