15 September: “Ai ise do goranon hasomanku”

Ai ise do hasomanku goranon”?

(Lukas 10: 29)

Bani banta ni halak Samaria na maridop ni uhur, ipatugah Tuhan Jesus do banta ise hasomanta. Hasomanta, ai ma na mamorluhon partolongan humbanta. Sedo sisungkunon atap sonaha pardihadihaonta bani, atap parja ai, atap bangsa aha ia. Sada do hansa na porlu botohon: Porlu ma ia dapotan partolongan humbanta, anggo porlu ma sitolongonta ma ai. Ai ma hasomanta.

Anggo ipatudu Naibata banta sitolongonta, tolong hita ma.

Somalni marsidalian do hita: Seng dong bahenonku, seng dong panorangku.

Tapi balos ni Tuhan Jesus dompak sagala sidalianta laho mangajari hita: Ningon mangurupi do hita bani sidea na mamorluhon ai, halani boi do ham mangurupisi.

Ra do Tuhanta mangaikkon hun Bani parkiraan ai ase ibalos use hu banta. Patut do ringgas janah malas uhurta mangurupi na mamorluhon partolonganta. Anggo hujai uhurta dong do bahenonta, dong do panorangta.

Marlajar ma hita bani hawajipanta pasal on. Anggo biak ni sitolongon do hansa natolong, biak ni manisia do hansa ai, tapi seng jonam onjolan ni partolongan ai. Tapi anggo halani idop ni uhur ni Tuhanta na dob jinalonta do manjuljul hita maridop ni uhur janah manolong, sintong ma ai.

Ningon iahap uhurta: Porini lang ihaholongi Naibata hita sonaha nari hita? Halani holong-Ni ai hita pe patut marholong homa. Pindoonta do hubani Tuhan Jesus use isiari holong-Ni ai hita, ase boi marholong hita songon-Si hubani hasomanta, na mamorluhon partolonganta.

Tonggo

Tuhan Naibata Bapanami na i nagoriatas! Gati do sundat iurupi hanami hasomannami na patut tolongon. Ipio Ham do hanami ase mangurupi. Sasap Ham ma panlanggaronnami bani “titah holong” ai. Useihon Ham ma holongMu bannami, ase mangalir hologMu ai pakon bani hasoman marhitei hanami

Amen.

Doding

Haleluya No. 192: 1-3: Haholongi si Parmahan >>

1. Haholongi si Parmahan na dear maruhur in,
Tuhan Jesus do mamorsan, haganupan dousamin.

2. Anggo kahou biri-biri, na pinarmahan-Ni in,
ra matektek do iluh-Ni laho mangindahi in.

3. Tor lamlam do pangabing-Ni bai ganup na kahou in,
paulakkon hu harangni humbai halimisan in.

16 September: Marholong, songon holong ni atei ni Jesus >>

<< 14 September: Haporsayaon na Marholong (songon Jesus)

tnt0915