14 September: Haporsayaon na Marholong (songon Jesus)

“Na so niurupannima age sahalak humbani na etek-etek on, sabonar Ahu do na so niurupannima ijai”

(Matius 25 : 45)

Na matei do haporsayaon na so marhasoman pambahenan, nini Apostel Yakobus. Haporsayaon bani Jesus na marholong ai, ningon marholong do. Na binahen bani sahalak na etek-etek (na mamorluhon partolongan) na hu Bani sandiri do ai ihira Tuhan Jesus.

Ase ukuran ni holongta bani Tuhan Jesus, holongta bani na etek-etek na i tanoh on do. Ai holong do uhur ni Tuhan Jesus bani sidea ganupan. Ai matei do Ia mangkopkop sidea haganupan, age panrampok, pamunuh, panangko pakon na legan. Masuk do ai haganupan bani hinaholongan ni Tuhan Jesus. Sonai do holongni bani na tading maetek, na mabalu, na boritan, na marsining, na mapitung, na marpusok ni uhur, holong do uhur-Ni bani na ibagas hasosakan. Seng mardeba-deba ihaholongi, irungkub holongni do haganupan.

Sonaha do ia hita? Sonaha do ibahen hita dompak na madoyuk, dompak na masombuh? Ai dihut do sidea hinopkop ni Kristus. Sonaha do partolongta dompak na boritan, na tading maetek? Anggo iurupi hita sidea, na roh humbani holongta do ai? Ipakei hita do nadong banta, duitta, panorangta patorsahon sidea ? Atap ibere hita sidea humbani lobih-lobihta tumang.

Aha do nani bahenon ni Tuhan Jesus porini manggoluh Ia sonari songon sapari itongah-tongahta. Songon pargoluhon-Ni do pargoluhonta, songon pambahenan-Ni do pambahenanta. On do ingatonta: Holong ni Tuhan Jesus na binere-Ni banta, ningon ai do onjolan ni holongta. “Na so niurupannima age sahalak na etek-etek on, sabonar Ahu do na so niurupan-nima“.  (Terj baru: “na so binahen nasiam age aha bani sada halak na etek-etek on, hu-Bangku do na so binahen nasiam ijai“).

Ra hona do hita haganupan ibahen hata ni Tuhanta ai. Pangahapta bani banggal ni holong ni Tuhan Jesus banta, hunjai do patubuh holong ibagas uhurta. Ningon mangalir do holong ni Tuhanta ai humbanta bani hasomanta.

Tonggo

Ham Tuhan Jesus: Bahen Ham ma ase huahap holong-Mu na banggal ai bangku, ase dihut ahu marholong songon Ham ai.

Amen.

Doding

Haleluya No. 194 : 1, 3: Sai Sihol Usihanku >>

1. Sai sihol usihanku ham Jesus Tuhankin
Bai toruh ni uhur-Mu lamlam ni Hata-Mu.
Sonaha bahenonku lao mandalankon in
Sai ham ma alo Tuhan manolong ai ijin.

3. Sonaha bahenonku maniru Tuhankin
Gok dousa do uhurhu age angkulangkin.
Urupi au, o Jesus sai sasap dousangkin.
Suanhon bai uhurhu holong ni atei-Mu.

15 September: Ai ise do goranon hasomanku” >>

<< 13 September: Irajai holong do goluhmu?

tnt160914