![](https://i0.wp.com/tadahnitonduyta.simalungun.net/wp-content/uploads/sites/7/2022/11/tnt1411.jpeg?resize=720%2C971&ssl=1)
Tapi anggo mambar in, aha ma bahenon paporadkon? Seng marguna be in, siambukkononkon mando in ase idogei-dogei halak.
(Mateus 5:13b)
Anggo mambar ma dai ni garam seng tarpakei be. Anggo mambar ma hakristenonta, seng marguna be hita bani dunia on, seng tarpakei be bani Naibata.
Anggo seng manjalo gogoh humbani Kristus, seng margogoh be mangimbang dousa na ibagas dirini pakon na i dunia on. Seng boi be gabe pasu-pasu bani na legan. Seng marguna bani manisia, seng margagan bani Naibata.
Seng iiankon Tonduy ni Naibata halak sisonai ai, lang be iihutkon Naibata, asal margoran Kristen mando. Ningon mulak mando ai bani Kristus na boi mambere gogoh manlawan dunia on, anggo lang, seng marguna be bani Naibata, sipadaraton mando humbani harajaon ni Naibata.
Porlu do pareksaonta paruhuronta, atap sonaha pargoluhonta, atap rap ope hita pakon Kristus. Anggo iahap hita talu do hita ibahen dunia on, gogohkon hita ma ase sirang hita humbani dousa, nadalankon ma use parsaoran na dear pakon Kristus sonai pakon Naibata.
Sonaha do pasal ham na mambasa pakon na mambogei hata in? Naibata do hasomanmu mangimbang dousa? Mangihutkon Kristus do goluhmu? Sai ulang ma mambar daimu (haporsayaonmu).
Garam na mambar ai na mardai hinan do ai lobei. Hita halak Kristen pe dear hinan do lobei bani mungkahni ondi. Halani ai jagaonta ma ase ulang ganggang humbani Tuhan Jesus, ase ulang songon garam na mambar hita. Pardaoh-donokta hubani Tuhanta do dainta i dunia on. Anggo ganggang ma hita mambar ma dai ai. Tapi anggo mulak rapat hita, mulak do mardai.
Ulang hampung uhurmu, sonari age pe dohor ham nuan bani Tuhanta. Si Judas manjual Tuhan Jesus, si Petrus mamorsou Tuhan Jesus, age pe domma orod sidea tolu tahun dokahni pakon Tuhan Jesus. Ningon tong do hita jaga.
Aha bahenon paporadkon? Sada do hansa, mulak rapat bani Tuhanta, gabe mardai ma use hita. Dalan na legan seng dong.
Tonggo
Ham Tuhan Jesus, suruh Ham ma TonduyMu na Pansing in ase ipatotap pardomuanku Bamu ase ulang gabe garam na mambar ahu. Amen.
Doding
Haleluya No. 120 :1, 5: Sai Hinsah Sai Gogoh >>
1. Sai hinsah, sai gogoh, sai hinsah mardalan ho.
Sion hu nagori atas, tongkin pe ho ulang soh.
Suluhmin baen marsinalsal! Bai na lihar in mardalan ho.
Sai hinsah, sai gogoh.5. Torus baen, torus baen, Sion torus uhurmu.
Mamingkiri hasonangan binahen ni Naibata.
Sai simbili hamagouan, Sion sai timbangi dalanmin.
Torus baen, torus baen.
Recent Comments