Ise humbannima na mabiar mangidah Jahowa, itangihon ma hata ni juak-juakni; ise na mardalan bani na golap, anjaha seng dong haliharon bani, ihatengerhon ma goran ni Jahowa, anjaha marpangajaman ma ia bani Naibatani.
(Jesaya 50: 10)
Ra do tibal ham i podomanmu mangarou naborit na parahni, atap iahap ham dong pusok ni uhurmu na banggal. Jadi martonggo ma ham bani Naibata, martonggo use hape tong roh parahni. Jadi roh ma sipanlajou ai mangkatahon bamu: Seng na itangihon Naibata be tonggomu, lang be ham songon niombah ni Naibata. Gabe roh ma pangahapmu: Lang be gakni tongon ihargai Naibata ahu, seng ra be Naibata mangkasomani ahu.
Anggo sonai golap ma tonduymu. Iuji ham pe martonggo seng be tolpus. Ibasai ham pe hata ni Naibata, seng jumpah ham be pangapoh. Ipindahi ham pe malas ni uhur ni na mangirikkon Jesus seng jumpah be. Roh ma, sipanlajou ai mangkatahon bamu: Seng jumpah ham be malas ni uhur humbani Naibata. Seng dong na lihar be ididah ham. Tuhan, aha ma sibahenonku?
Hata na tarsurat iatas on ma sibahenonmu: Hatengerhon ham ma goran ni Jahowa anjaha mangunsandei ma Ham bani Naibatamu. Ihatahon ham do ibagas uhurmu: Seng huahap be dohor Naibata i lambungku. Tapi hata ni Naibata mangkatahon: Dohor do Naibata bani ganup na mandilosi, na mandilosi ibagas hasintongan. (Psalm 145: 18). Ijai mamungkah ma iahap hita dohor Naibata.
Hata ni Naibata do homa mangkatahon: Mintor tarhalupahon anggo nangon ma anak tinubuhkonni, porini pe ihalupahon anggo. Ahu seng halupaonkononku ho. Tonggor ma domma pala huuhirhon goranmu bani jampal ni tanganku haduasi. (Psalm. 49:15). Ijai ma boi akuonkonku: Seng lupa Naibata bangku. Pardompakta maningon tongtong dompak Tuhanta ia tompas pe hita tangkop, tapi hundul honsi atap jongjong honsi, mintor dompak Tuhanta ma hita tong.
Tonggo
Ham Tuhan Naibata! Urupi Ham ma ahu ase tongtong huahap ihasomani Ham do ahu marhitei Tuhan Jesus Kristus Tuhanku. Amen.
Doding
Haleluya No. 154: 1, 2, 4: Marsipota pe Idahon >>
1. Marsipota pe idahon, hita songon tinadingkon
Ni Tuhanta Bapa in, sedo na tongon sonin2. ‘Ge malambat pe sipota pangurupi ni Tuhanta,
anggo roh panorangnin, mintor tongoson-Ni in.4. Tenger uhur bai Bapangku naha pe hasosakan ku,
sai holong atei-Ni in dompak au anak-Ni in.
Recent Comments