Anggo Ia, patut do lambin banggal, tapi ahu lambin etek ma.
(Johanes 3: 30)
Iambilankon si Johannes pandidi do pasal hamubahon ni uhur. Buei do na manangar ambilanni, marhulan-hulan roh hu bani si Johannes Pandidi: Na bayak, na masombuh na maruhur pakon jolma sisaluju. Isungkun sidea ma ia atap aha sibahenonni.
Ninuhur ni na mabuei in homa, atap ia ma Kristus ia, na pinarbagah in. Roh ma utusan ni harungguan ni bangsa ai atap ia ma Kristus, ai tarbarita ma ia janah ihormat halak. Tapi isaksihon ma sedo ia Kristus. Tapi domma jongjong i tongah-tongah nasiam na so tinanda nasiam. Seng talup ahu mangkarhari tali ni sipatuni. (Joh 1: 20, 26, 27).
Bani sada ari roh ma Tuhan Jesus bani pandidion ni si Johannes mangindo ase dihut Ia ididi, tapi nini si Johannes ma: Ham do patut mandidi ahu mase Ham roh hu bangku? Balos ni Tuhan Jesus: Patut do idalankon hita sagala hapintoron. Dob ai ididi ma Ia. Dob jongjong Tuhan Jesus humbani na tardidi ai, mungkab ma langit Bani, taridah ma Tonduy na Pansing sogop bani. (Mat 3: 14-16).
Hunjia nari ma isaksihon si Johannes Jesus paboa do Mesias na laho roh ia: Tonggor ma on ma biribiri ni Naibata na mamorsan dousa ni dunia on. Ituduhkon Jesus bani susianni, isuruh susianni mangihutkon Jesus. Dob ni lambin lang piga be roh bani si Johannes. Ipatugah hasoman do na lambin buei mangihut-ihut Jesus. Balos ni si Johannes: Seng dong age aha bani age ise anggo seng ibere humbabou. “la ningon lambin banggal ahu lambin etek”. Marhiteon ai ma gok malas ni uhurhu, nini si Johannes.
Porini lakuhon si Johannes ijia ia Kristus, porsaya do halak namin, ai domma buei na porsaya bani ambilanni. Tapi ibotoh do hundulanni, ipatoruh do uhumi. Gabe malas ma uhurni.
Tonggo
Ham Tuhan Naibata! Ajari Ham ma ahu: Sai lambin etek ma ahu (hadirionku), lambin banggal ma Ham ibagas diringku, ase malas uhurhu. Amen.
Doding
Haleluya No. 194: 1,3: Sai Sihol Usihanku >>
1. Sai sihol usihanku ham Jesus Tuhankin
Bai toruh ni uhur-Mu lamlam ni Hata-Mu.
Sonaha bahenonku lao mandalankon in
Sai ham ma alo Tuhan manolong ai ijin.3. Sonaha bahenonku maniru Tuhankin
Gok dousa do uhurhu age angkulangkin.
Urupi au, o Jesus sai sasap dousangkin.
Suanhon bai uhurhu holong ni atei-Mu.
Recent Comments