13 September: Irajai holong do goluhmu?

“Porini pe hulayak-layakkon haganup artangku anjaha iondoskon badanku ase ipuruni, anggo seng dong haholongon bangku, seng marguna ai bangku”.

(1 Korintus 13: 3)

Irajai holong do goluhmu? Huja do rumbak ni hata pakon parlahoumu, hubani haholongon do? Dear do sungkun hita dirinta be ilobei ni Naibata pasal ai, atap huja do rumbak ni goluhta ari-ari.

Martorap naidah songon halak Kristen na bujur do sada halak, marsibere-bere bani na masombuh, mambere bani harajaon Naibata, hape uhurni legan do, ase dapot pujian ia humbani hasoman jolma, atap marhitei surat kabar.

Tapi sidingatonta: Atap aha pe ibahen hita tujuonta ma marhitei ai ase dapot pujian Naibata, sedo jolma. Anggo seng roh ai humbani holong, seng dapot pujian Naibata, na mambere ai pe seng dapot pujian humbani Naibata. Gabe maila do hansa ia holi bani paruhuman banggal ai.

Sonai do homa ibagas parsaoran atap parsahapan, sihol ma roh ai humbani holong, ulang namin ibagas untung sandiri. Ai do rimpun ni tujuan ni Apostel Paulus ibagas surat 1 Korintus 13 ai. “Na lumbang do haholongon ai anjaha na sorta, seng mangunsaga, seng ipajuntul-juntul dirini, seng barsang haholongon ai, seng isari hauntunganni sandiri, seng pargila-gila, seng iparimbagaskon hasalahan ni hasoman, seng dear uhurni bani hagedukon, tapi tongtong marmalas ni uhur bani hasintongan. Haganup do irungkub, haganup do ihaporsayai, haganup do iarapkon, haganup do itaron. Seng ra salpu haholongon ai. Salpu do panjahaion, mangadi do age sahap, habotohon maronti do.“

Sonaha, domma sonai paruhuronta pakon parsaoronta hubani hasomanta? Pag ma hita mangkatahon “eak” porini isungkun hita ilobei ni Naibata?

Tonggo

Ham Tuhan Naibata! Paluah Ham ma ahu humbani na mansarihon diri tumang, na so mangkaholongi na legan. Sai iahap hanami ma holong ni Tuhan Jesus Kristus, ase tubuh janah mardalan holong ai humbannami.

Amen.

Doding

Haleluya No. 120: 6: 120. Sai Hinsah Sai Gogoh >>
6. Pakei ma, pakei ma, pakei gogohmin ganup.
Patidakkon na marholong, uhurmin bai Jesus in.
Na marsinta ho, o Sion, mangirikkon ganup Hata in.
Pakei ma, gogohmin.

14 September:  Haporsayaon na Marholong (songon Jesus) >>

<< 12 September: Kuasa ni Dosa pakon Jolma na Baru

tnt0913