“Hudidah do titah na legan bani pagori ni angkulangku, na marmunsuh pakon titah na ibagas uhurhu, gabe itaban do ahu halani kuasa ni dousa na ibagas dagingku”.
(Roma 7: 23)
Halak na dob manjalo Kristus salih do ai gabe jolma na baru. Jolma na baru ai marosuh do mandalankon titah ni Naibata. Tapi hita halak Kristen iahap hita do songon dong do surdung pangindoan ni daging songon sapari ai, si Adam sapari ai seng dong uhurni sihol mandalankon titah ni Naibata, tapi si Adam na baru ai na ibagas Kristus, marosuh do mandalankon titah ni Naibata.
Marlawan ma na dua ai ibagas uhur diri. Parah do parlawanan ai anjaha marnunut-nunut. Lang iahap hita rombang do ai? Halak lama ai mansarihon dirini pasonang dirini tumang. Halak baru ai sihol mansarihon na legan, mambahen na madear dompak hasoman. Halak baru ai sihol manggoluh ibagas damei pakon hasonangan. Halak lama ai marosuh do uhurni bani na butak, manggoluh bani na so borsih. Jolma baru ai holong do uhurni bani hasintongan, sogam bani uhur na so sintong. Jolma lama ai holong do uhurni bani ladung.
Martorap songon parmunsuhni na parah do on janah marnunut-nunut ibagas uhurta sadokah manggoluh hita. Tapi jolma baru na ibagas Kristus gogohan do ai ase jolma lama ai. Ibagas gok ni haporsayaon ningon monang do ai mangimbang hagolapanni. Gogoh ni titah na bani angkula ai boi do talu. Tapi anggo iahap ham songon na galek ham, mintor pindo ham ma idop ni uhur ni Naibata pakon hasasapan ni dousamu. Pindoonmu homa Tonduy ni Tuhanta margogohi ham pasaudkon harosuh ni Tuhanta, pasaudkon harosuh ni Naibata.
Ase anggo roh ma paruntolon ai ibagas uhurmu, maruntol jolma baru pakon jolma lama na i bagas uhurmu, ulang ham ra sahalak ham maruntol. Mintor pio ham ma Tuhan Jesus na dob monang sagala paruntolon mangimbang dousa pakon sibolis. Urupanni do ham.
Tonggo
Ham Tuhan Jesus! Hu Bamu do ahu maporus. Ra do Ham mangkasomani ahu bani parlawananku dompak hadirionku na buruk ai. Bere Ham ma bangku hamonangan. Amen.
Doding
Haleluya No. 110: 2,5: Payah ai Tungkis Tumang >>
2. Upah sibanggalan in dapot na bujur uhurni.
Na mangimbang dousa in pakon hisap nidagingni,
Pitah holong-Mu do in, boi manasap dousangkin.5. Sai tenger ma uhurmin, na mangimbang hisapnima!
Ingat Jesus na dob in, manggalari dousanima.
Ai marhitei Jesus in dapot hasonangan in.
13 September: Irajai Holong do Goluhmu? >>
<< 11 September: Marosuh Mandalankon Titah
tnt0912
Recent Comments