13 Oktober: Anggo Masa Sitaronon

tnt_okt13

“Ai sedo humbani rosuh ni uhurni ia mangarsik atap mambahen pusok ni uhur ni jolma”.

(Tangis-tangis 3 : 33)

(Terj baru, 1976: “Ai sedo halani rosuhni, ase iarsik anjaha ipusoki uhur ni anak ni jolma”)

Roh do martorap na mambahen marsik atap na mambahen pusok ni uhur banta, janah iahap hita na songon uhuman ni Naibata ai hu banta.

Sedo mangahumi ai tujuan ni Naibata, tapi manjuljul hita do ase laho hubani panandaon bani dousa pakon hu hamubahon ni uhur. Sedo pusok ni uhur ai tujuan ni Naibata, hitei do ai mananda lepakta, salahta pakon mananda dousanta, ase ra hita mamilangi gabe marjora-jora laho hu hamubahon ni uhur. Anggo sonai, dobni gabe itatap uhurta ma Tuhan Jesus Sipaluah hita na dob manaron na marsik janah matei bani hayu parsilang manggalar utang dousanta. Jadi roh ma hita hu Bani ibagas haporsayaon na sintong manjalo idop ni uhurni hasasapan ni dousanta. Jadi ijalo ma hita mulak gabe anak ni Naibata, ijai lambin sabar ma uhurta ibagas sitaronon ai halani pangarapan ai.

Atap aha pe na mambahen pusok ni uhurmu, naborit, matean, harugian atap sitaronon na legan pe, botoh ham ma sedo ai tujuan ni Naibata bamu. Tujuanni ase mulak do ham hubani Naibata.

Halani ai atap aha pe na roh bamu na mambahen pusok ni uhurmu, ondoskon ham ma bani Naibata, ai hiteini do ai padohor dirimu hubani Dirini.

Porlu tumang sanggah marsonang-sonang hita roh tong hita hubani Naibata, ase ulang tarpaksa Naibata pala manongos pusok ni uhur laho manogu hita mulak hu Bani. Sedo humbani rosuh ni uhurni Ia mangarsik mambahen pusok ni uhur ni jolma, Anggo manlembang-lembang biribiri humbani hulananni ra do ilonsing parmahan, ase mulak hubani hulanan ai.

Ase siap masa sitaronon banta, na porlu pingkironkonta: Hitei ni Naibata do on, mandilo ahu mulak rapat hu Bani. Balosi hita ma pandiloon-Ni ai, ase sabar janah sonang uhurta manaron sitaronon ai.

Tonggo

Ham Tuhan Naibata! Urupi Ham ma hanami mananda holong ateimu. Ia roh pe naborit atap pusok ni uhur na legan, tujuanmu ase mulak do hanami hu Bamu. Patenger Ham ma uhurnami bani holong ni ateimu. Amen.

Doding

Haleluya No. 153: 1, 5, 6: Ondoskon Haganupan >>

1. Ondoskon haganupan, horu ni uhurmin,
Bai Naibata Jahowa, sidear gabei in
Ai guru bai Tuhanta do tanoh pakon laut
Buei sintani jolma, uhurni do na saud.

5. Paturut Naibantanta patorsa langkahmin ;
Na pandei do Tuhanta, ganup pasirsir in.
‘Tor sungkod pingkiran-Ni lao paluahkon ho ?
Gogoh-Ni ituduhkon, ase ididah ho.

6. Ai pe, 0 Tuhannami, taluhon hajojor
Pusok ni uhurnami sagala na sambor
Hu surga in sai bolas ma tonduynami rup
Hu tangan-Mu ma ondos hanami on ganup .

Oktober 14: Mangkaholongi Dakdanak >>

<< 12 Oktober: Gijang ni Uhur