11 Oktober: Songon Dakdanak na Saluyu

“Anggo lang marubah hanima gabe songon dakdanak seng boi masuk hanima bani Harajaon Nagoriatas”.

(Mateus 13: 3)

Hitei laho masuk hu nagoriatas, ai ma parubahan. “Anggo lang marubah hanima gabe songon dakdanak, seng boi masuk hanima hu harajaon nagoriatas”.

Hata in sedo pitah berean piga-piga halak, berean haganupan do bamu, pakon bangku. Sai mardai ma hata ni Tuhanta banta, ase ai mambobai hita bani uhur na borsih, songon dakdanak, na saluyu, seng marlegot-legot, seng dong gijang ni uhur.

Ingat hita, bani Parisei do lobei iluarhon hata on. lahap sidea seng pala be mubah sidea, ai idalankon do titah ni Naibata. Sedo parbangkis sedo panangko sidea. Tapi sada salah banggal sidea, anjaha lepakni: Niombouni do ninuhurni hapintoronni, janah domma pintor sidea seng porlu be hamubahon, pardousa do porlu mubah anggo sidea lang pala be. Gijang do uhur ni sidea, ai ma mambahen na so boi masuk sidea hu harajaon nagoriatas ai, Harajaon ni Naibata.

Buei do hita na songon na magodang ibagas harajaon ni Naibata, sedo songon dakdanak, ai do mambahen daoh hita humbani Naibata. Maningon ari-ari do hita maningon margoling marubah gabe songon dakdanak, maruhur na saluyu na so dong gijang ni uhur, na mangunsandei bani orangtuani tumang. Songon dakdanak na hundul hun talaga luluan mandompakkon orangtua, ulang ma hita songon na magodang manadingkon orangtua.

Buei do pulungan na porlu bani dakdanak, na dob magou dob magodang jolma: saluyu, seng marladung, seng gijang uhurni, tenger tumang uhurni bani urangtua. Dob magodang roh ma uhur na marlego-legot, na marladung, lang be gok tenger ni uhurni bani orangtuani.

Ase maningon ari-ari hita marpingkir laho patontangkon langkahta ampa pardompakta dompak Naibata.

Tonggo

Ham Tuhan Naibata! Urupi Ham ma ahu pahusorhon uhurhu ase gabe songon dakdanak, ase masuk ahu hu harajaonmu. Amen.

Doding

Haleluya No. 192 :1-3: Haholongi si Parmahan >>

1. Haholongi si Parmahan na dear maruhur in,
Tuhan Jesus do mamorsan, haganupan dousamin.

2. Anggo kahou biri-biri, na pinarmahan-Ni in,
ra matektek do iluh-Ni laho mangindahi in.

3. Tor lamlam do pangabing-Ni bai ganup na kahou in,
paulakkon hu harangni humbai halimisan in.

12 Oktober: Gijang ni Uhur >>

 << 10 Oktober: “Ahu do Parpuhoon pakon Hagoluhan”