“Na ibabou ai ma paruhurhon nasiam, ulang ma na iatas tanoh on”.
(Kolose 3: 2)
Buei tumang do parmaraan bani goluh partonduyon ni hita halak Kristen. Buei tumang do pingkiran na paganggang hita hu hubani Naibata. Buei do na i tanoh on pakon arta ni tanoh on, na manrahut uhurta na mambahen lupa hita bani hasusuranta i nagoriatas, gabe lupa ma hita na manginsolat do hansa hita i nagoritongah on.
Ai do ase isuratkon Apostel Paulus hata na i atas on: “Na ibabou ai ma uhuri nasiam. ulang na i tanoh on”! Ulang ma holong ni uhurmu bani dunia, bani malas ni uhur na ijon, bani hamajuon, bani hapentaran pakon na legan, gabe lupa ham bani simada goluh on, hatuahon ni tonduymu. Gati ma pingkir ham dompak babou, ijai seng masa be halojaon, hasunsahan. Ijai malas ni uhur mando masa lanjar. Pingkirhon ma gelah: Tongkin do i tanoh on pakon sagala malas ni uhumi. Tadingonkonta do in haganupan ase laho hita bani Kristus Sipaluah hita. Anggo ipingkirkon ham pasal na i babou ai, ra ma ham sirang humbani pargoluhon dunia na mangilei on, tapi malas ma uhurmu bani Naibata.
Tonggomu pe sonon ma: Ham Bapanami na i Nagoriatas, maidop ma uhurmu mangidah ahu, bere Ham ma bangku gogoh mambalosi Ham. Tompa Ham ma uhur nabayu ibagas uhurhu janah pabayu Ham tonduyhu. Urupi Ham ma ahu ase boi huusir sagala pingkiran na jahat humbagas uhurhu. Urupi Ham ahu manundalhon hajungkaton, sahap na barsang, ampa sagala na masambor. Ajari Ham ma ahu hubani na madear: Toruh ni uhur, halamlamon, habasaron, lumbang ni uhur.
Ra do Naibata mambalosi tonggo na sonai ai. Hita pe manggogoh ma manrotapi uhur dunia on janah mangindo gogoh ase iparmaloi janah ipargogohi Tuhanta hita manundalhon dunia on. Pagati hita ma mangkawah dompak babou, mamingkiri parmasukta hujai. Ulang tibal tohang hansa pardalan ni uhurta, ningon sirdok do dompak babou.
Tonggo
Ham Bapanami na i Nagoriatas! Urupi Ham ma ahu mantanggalhon sagala panrait ni dunia on. Pasihol Ham ma uhurhu dompak Nagoriatas, bani iananmu na pansing na mulia in. Amen.
Doding
Haleluya No. 123: 1, 3: Hu Nagori Atas do >>
1. Hu nagori atas do pardalanta in.
Ganup na pininta lo dapot ma ijin
Anggo ijon mubah-ubah do ganup,
seng sadiha na talup, i tanoh on.3. Hu nagori atas in tonggor ma tongtong.
Anggo dong na hurangmin i dunia on.
Lang bulih be bumbang uhurmin ijin;
Ai sirsir do haganup bai Naibata.
Recent Comments