11 Juli: Hail ni si Bolis

“Jaga ma nasiam, ai madou-adou do munsuh nasiam sibolis ai songon singa na maraum mangindahi atap ise boi boluronni.”

(1 Petrus 5:8)

Halak na sihol gabe anak ni Naibata, dong do munsuh-Ni, ai ma sibolis. Tongtong do ia dohor hu banta. Irik do ia banta mangirik-irik pargoluhonta. Mardalani do ia mangindahi jolma ase sirangonni humbani Naibata, ase gabe rayatni itoruh ni parentahni ronsi gabe jabolonni.

Porlu do tong idingat hita horja ni sibolis na jahat ai. Porlu iahap hita dohor do ia hu banta manggompangi hita ase isurbit hita hail dousa ai marhitei ompan na mantin santongkin ai. Anggo lupa hita bani hail ni sibolis ai, ijai tarpangan ma ompan dousa ai, homa halani ma hita ijai ma hita gabe urangni.

Pindoonta ma ase iparmaloi, ipargogohi Naibata hita manjaga dirinta anggo maruntol hita pakon na songon singa ai, na mangindahi siboluronni, ulang sompat hita ibondut. Halani ai gopas ma hita tong janah sirsir manjupahkon munsuhta, munsuh ni tonduyta ai. Ipasirsir do hita dompak parmunsuhan bani sibolis.

Anggo na mangihutkon Kristus do hita, ibotoh hita do na marmunsuh do Kristus pakon sibolis, janah italuhon do sibolis.

Rapkon Tuhanta tarbahen do hita mangimbang sibolis janah monang. Kristus do gogohta janah batar-batarta. Gogoh ni Kristus seng tartaluhon sibolis age nagoritoruh.

Buhai hita ma uhurta, ase dong tong kamar ni Tuhan Jesus ibagas uhurta, ase marhasoman Tuhan Jesus hita manlawan sibolis. Ari-ari ma pingkirhon hita, ia sibolis ai tongtong do sihol manirang hita humbani Naibata, ase ibolur hita masuk gabe rayatni atap jabolonni. Pindo hita ma ase rap mardalan hita ari-ari pakon Tuhan Jesus gabe monang ma hita mangunsagahon-Si.

Tonggo

Tarima kasih ma Bamu Tuhan Jesus! Halani ra do Ham mangkasomani ahu mangimbang sibolis na dob tinaluhon-Mu. Urupi Ham ma ahu bani sagala paruntolonku.

Amen.

Doding

Haleluya No 113 : 1 – 3: Asal Rap Ampakon Tuhan Jesus Au >>

1. Asal rap ampakon Tuhan Jesus au.
Sadokahni mangiankon tanoh hasusahan au.
Sonang do uhurhu, ai hubotoh Jesus hasomanku.

2.Anggo Tuhan Jesus hasomanku tong
Bahenonku do maporus sigompangi tonduyhon.
Sai martuah diri, anggo Jesus do hasoman diri.

3.Sonang do uhurhu rapkon Jesus in.
Ai isasap do dousangku, ipatorang langkahkin.
Ase ulang magou tonduyhin bahenon ni pangagou.