10 Agustus: Goluh na Lambin Romban Bani Rosuh ni Naibata

“Ai sagala na binobahon ni Tonduy ni Naibata, ai ma anak ni Naibata.”

(Roma 8:14)

lbotoh hita sedo ganup jolma panean, anak do panean bani arta ni bapani. Anggo anak hita bani Naibata, panean ma hita bani arta ni Naibata. Ai ma ase porlu torang banta atap na tongon ma hita anak (boru) ni Naibata atap lang.

Hunja nabotoh ai? Isuratkon Apostel Paulus: Sagala na binobahon ni Tonduy ni Naibata, ai ma anak ni Naibata.

Patut ma sungkunonmu humbani tongon ni uhurmu: Domma sintong ahu anak ni Naibata? Sanggah tardidi hita domma iain Naibata hita gabe niombah-Ni. Hunjai nari maningon lambin banggal haporsayaonta. Ningon lambin malas uhurta bani haanakon ai.

Janah tarima kasih uhurta halani idop ni uhur ni Naibata, janah malas uhurta mandalankon harosuh-Ni. Jadi lambin romban ma goluhta bani goluh na pinindo ni Naibata, lambin malas uhurta mangkorjahon harosuh ni Naibata. Lambin iahap hita ma pangkorhon ni goluh Kristus ibagas goluhta.

Haganupan ai Tonduy na Pansing do manogu-nogu hita ase das hunjai. Anggo songon na lupa ham mangidangi Naibata, pindo ham ma Tonduy na Pansing ai ase ibere idop ni uhur-Ni bamu, ase mulak malas uhurmu mandalankon harosuh ni Naibata. Anggo roh uhur jahat bamu, pindo ham ma homa gogoh bani Tuhan Jesus, ase margogoh ham mangusir uhur na sonai ai. Sanggah marpingkir ham pasal Naibata, dear ma basa ham hata ni Naibata, atap tangihon ham ambilan i gareja atap partonggoan pe.

Hata ni Naibata do hitei ni Tonduy na Pansing mambobahon hita bani Tuhan Jesus. Sonaha, pongkut do itangihon ham hata ni Naibata na patorangkon pangkopkopon ni Tuhan Jesus bamu, na tinaronni das hu haju parsilang ai? Ningon tangi do hita bani hata ni Naibata, ibagas ai do marhorja Tonduy ni Naibata mambobahon hita hubani Naibata.

Halani ai ulang mamaholang hita mambasa hata ni Naibata, ulang mamaholang hita hu parmingguan age hu partonggoan pe, ase tong marhorja Tonduy ni Naibata mamboan hita bani Naibata pakon Tuhanta Jesus Kristus.

Tonggo

Ham Tuhan Naibata, Bapanami na i nagoriatas! Suruh Ham ma Tonduy na Pansing ai marhorja ibagas uhurhu, laho mambobai ahu hu Bamu.

Amen.

Doding

Haleluya No. 83 : 1, 4: Roh ma Ham, Tonduy Na Pansing >>

1. Roh ma Ham Tonduy na Pansing, Naibatangku na botul,
Uhurnami ma papansing, mambalosi Ham bujur.
Sai sondangi Ham totap uhurnami na golap.

4. Pabotohkon Ham bannami na niambilankon-Mu:
Naibata do Bapanami, hanai on do anak-Nin.
Daroh niuseihon in, do ondolan lao hujin.

11 Agustus: Manjalo Tonduy ni Naibata >>

<< 9 Agustus: Manaron rap pakon Kristus