1 April: Ise do ipilih hita?

tnt_april2

Ulang ma Ia (Jesus) si Barabbas ma!

(Johannes 18:40)

Domma songon hasomalan bani sidea, sai ipaluah Gubernur do sahalak hun tutupan halak Jahudi bani an pesta Paska, mangihutkon pangindoan ni sidea. Sanggah panorang ni Tuhan Jesus iuhum dong do sada na tartutup, ai ma si Barabbas, na tartutup halani manrampok. Sanggah humpul Jahudi isungkun Gubernur (panguhum) Latus ma: Ise do paluahonku bani nasiam si Barabbas do atap Jesus na ginoran Kristus? Marsurak ma sidea marbalos: Sedo halak on, si Barabbas ma. Aha do bahenonku bani Jesus, na ginoran Kristus? Haganup ma sidea mangkatahon bani parsilangkon ma Ia.

Marpingkir ma hita. Bani panorang on, bani panorang hasunsahan ni bangsa-bangsa i dunia on, roh do sungkun-sungkun bani bangsa in sonari: Jesus Kristus do pilihonmu sibalosanmu, atap politikmu sandiri. Sihol mardomu do ham pakon Naibata atap sihol sirang? Sihol bolosananmu do Jesus gabe Sipaluah ham? Atap nimu: Sedo Ia tinodoh ni uhurhu, sandiri do. Seng ope sihol roh bangsa in bani Jesus. Jadi soh ma sidea ibagas dousani.

Anggo ipilih hita Tuhan Jesus siidanganta, ijai do homa hita mamilih hagoluhan na sadokah ni dokahni. Porlu pangkei hita bani pamilihon on, janah porlu putus uhurta manontuhon sipilihonta, na gabe sibalosanta siidanganta.

Sadokahni on ipilih bangsa-bangsa in do pingkiran na marbagei-bagei in laho patorsahon masyarakat ni dunia on. Dobni gabe paringoran ni bangsa na sada do bani bangsa na legan. Masa ma munsuh, porang pakon sagala pangkorhonni. Hita pe marsasahalak putuskon hita ma mamilih Tuhan Jesus gabe Tuhan ni goluhta sonari ronsi magira.

Tonggo

Ham Tuhan Jesus! Sai Ham ma ipilih hanami bani panorang on. Sasap Ham ma dousanami. Urupi Ham ma hanami mamilih Ham bannami.

Amen.

Doding

Haleluya No. 5: 2, 3. Hupuji Holong ni Atei-Mu >>

2. Sai ipindahi Ham do ahu, Ham pe huhasiholi do.
Itogu uhurMu uhurhu halani ai hubere do:
lpilih Ham hinan tonduyhu, ai pe hupilih Ham Tuhanku.

3. Huahap maningon mar-Tuhan, ningon manggoluh au Bamu:
Seng jumpah au be hagoluhan, anggo seng pinasirsirMu:
Sai Ham na baen parsarananku, sai gok Bamu mando langkahku.

2 April: “Pasal ham do deba ase pala tarsilang Ia”.

<< 31 Maret: Mangkawah Ma Hita Dompak Jesus