“Sai mulak ma nasiam anak na marbalik in, ase hupamalum panundalion nasiam ai! Tonggor ma roh ma hanami mangayaki Ham, ai ham do Jahowa Naibatanami”. (Jeremia 3: 22)
Anggo halak Israel ai ma bangsa na pinasu-pasu ni Naibata, ai bangsa na dob pinilih ni Naibata do sidea, ipatuduhkon bani sidea hatuahon. Domma marpadan bangsa Israel mambalosi (mangidangi) Naibata janah mandalankon titahni. Tapi lupa ma sidea bani padan ai. Lupa ma sidea bani Naibata na mamasu-masu sidea. Domma itundalhon Jahowa, laho dompak sisombah-sombahon mangihutkon rosuh ni daging. Nini sidea: Domma lopas hita humbani Naibata, seng pot hita be mulak hu Bani.
Tapi seng lupa Naibata bani bangsani: “Sai mulak ma nasiam anak na marbalik in” nini. “Ase hupamalum panundalion nasiam”. Tapi seng ihargahon golpa-golpa ni Naibata, seng ra mulak halak Israel.
Hita halak Kristen pe bangsa na dob pinilih ni Naibata do hita. Sanggah tardidi atap sanggah manaksihon haporsayaon, marpadan do hita mangkaholongi Naibata ampa mandalankon titahni, ase ipasu-ipasu Naibata hita.
Ai lang buei do hita Kristen na lupa bani pangakuan sanggah na tardidi ai pakon sanggah manaksihon haporsayaon ai? Domma daoh ia humbani Naibata, ibahen ma use sisombahonni atap hatengeran ni uhurni sobali Naibata, atap hasangapon, uhur daging, gijang ni uhur. Sai iuji ma manlupahon titah ni Naibata, seng ra sidea mulak bani Naibata.
Tapi seng lupa Naibata bani, idilo do ia use “Sai mulak ma nasiam anak na marbalik in, ase hupamalum panundalion nasiam”. Dob seng iparduli golpa-golpa ni Naibata, ai do deba halani ase itongos naborit, pusok ni uhur, sitaronon, ase itangihon sora ni Naibata, atap ra marhiteihon ai ibogei sora ni Naibata ma mandilo ai: “Sai mulak ma ho.”
Balosta namin songon balos na bani ayat na i atas on ma: “Tonggor ma, roh ma hanami mangayaki Ham, ai Ham do Jahowa Naibatanami”. Putus ni uhur mambalosi dilo-dilo ni Naibata do mambahen roh balos na sonai. Sai mulak hita hubani Naibata, ai malas do uhur-Ni manjalo hita.
Ham Tuhan Naibata! Urupi Ham ma hanami mananda panundalionnami, mananda dousanami. Togu Ham ma hanami mulak hu Bamu, mangkatahon: Roh ma hanami, mulak ma hanami hu Bamu. Amen.
Haleluya No. 111 : 1, 4: Sai Mulak, Sai Mulak >>
1. Sai mulak, sai mulak na mardagang do ho!
Ai daoh ho nuan, sirang do tuah min.
O pardagang ou! Mulak! Mulak ma ho!
Mulak! Mulak ma ho!
4. Sai mulak, sai mulak, ai na sonang ma ho.
Sahei ma dousamu, dapot pinintamu.
O pardagang ou! Mulak! Mulak ma ho!
Mulak! Mulak ma ho!
26 September: “Seng ra Naibata apasan” >>
<< 24 September: Dua parlahou na porlu
tnt160925
Recent Comments