“𝙎𝙤𝙣𝙖𝙞 𝙢𝙖 𝙢𝙖𝙧𝙨𝙞𝙣𝙖𝙡𝙨𝙖𝙡 𝙥𝙖𝙣𝙤𝙣𝙙𝙖𝙣𝙜𝙣𝙞𝙢𝙖 𝙞𝙡𝙤𝙗𝙚! 𝙉𝙞 𝙝𝙖𝙡𝙖𝙠, 𝙖𝙨𝙚 𝙞𝙞𝙙𝙖𝙝 𝙝𝙤𝙧𝙟𝙖𝙣𝙞𝙢𝙖 𝙣𝙖 𝙙𝙚𝙖𝙧 𝙞𝙣, 𝙖𝙨𝙚 𝙞𝙥𝙪𝙟𝙞 𝙨𝙞𝙙𝙚𝙖 𝙗𝙖𝙥𝙖𝙣𝙞𝙢𝙖 𝙣𝙖 𝙞 𝙣𝙖𝙜𝙤𝙧𝙞 𝙖𝙩𝙖𝙨 𝙞𝙣””. (Mateus 5 : 16)
Halak na so mananda Naibata, songon na mardalan bani na golap do ai. Na porsaya bani Kristus do na mananda Naibata. Ibotoh na holong do uhur ni Naibata. Iidangi do Naibata marhitei holong ampa horja na madear, na manaksihon holong ni Naibata na dob jinaloni. Jadi gabe marsinalsal ma ia bani na mardalan bani na golap ai, patuduhkon dalan dompak rumah ni Naibata.
Hita halak Kristen gati do miloh sinalsal na ibagas dirinta, halani parlajoan na roh hu banta. Gati ipasip hita age pe porlu namin bani panorang ai manaksihon holong ni atei ni Naibata bani hita jolma. Gati songon na maila malang atei hita manluarhon hasaksianta, na dob dong ibagas uhurta.
Hita anak haliharon gati mardalan hita bani na golap i dunia on. Anggo lang hita marsinalsal be, miloh ma panondangta, gabe lambin golap ma uhur pakon goluhta.
Tangihon hita ma hata ni Sipaluah in: “Sonai ma marsinalsal panondangnima ilobei ni halak”. I rumahmu ma lobei marsinalsal panondangmu, taridah ibagas goluhmu. Gabe ididah dunia on ma: rumahmu hape ianan ni holong pakon haliharon. Ibogei do hasaksianmu pasal holong ni atei ni Naibata bani jolma. Ididah do holong ni uhurmu bani nasiam na sarumah. Hun rumahta marsinalsal panondang ai, gabe ipuji dunia on ma Naibata, marhitei holong ni Naibatanta.
Tontu, hita do mangahapkon atap na hurang holongta ibagas uhurta, na tarbogei bani hatanta, na taridah bani parlahouta, gabe hurang marsinalsal.
Tonduy ni Naibata do na mambere minak haporsayaonta ase marsinalsal suluh haporsayaonta mansalsalhon haholongon.
𝙃𝙖𝙢 𝙏𝙪𝙝𝙖𝙣 𝙉𝙖𝙞𝙗𝙖𝙩𝙖! 𝘽𝙚𝙧𝙚 𝙃𝙖𝙢 𝙢𝙖 𝙏𝙤𝙣𝙙𝙪𝙮𝙈𝙪 𝙗𝙖𝙣𝙣𝙖𝙢𝙞, 𝙖𝙨𝙚 𝙝𝙤𝙡𝙤𝙣𝙜 𝙪𝙝𝙪𝙧𝙣𝙖𝙢𝙞 𝘽𝙖𝙢𝙪 𝙥𝙖𝙠𝙤𝙣 𝙗𝙖𝙣𝙞 𝙝𝙖𝙨𝙤𝙢𝙖𝙣 𝙟𝙤𝙡𝙢𝙖. 𝘽𝙖𝙝𝙚𝙣 𝙃𝙖𝙢 𝙢𝙖 𝙢𝙖𝙧𝙨𝙞𝙣𝙖𝙡𝙨𝙖𝙡 𝙝𝙖𝙥𝙤𝙧𝙨𝙖𝙮𝙖𝙤𝙣𝙣𝙖𝙢𝙞, 𝙖𝙨𝙚 𝙩𝙖𝙧𝙥𝙪𝙟𝙞 𝙃𝙖𝙢 𝙢𝙖𝙝𝙞𝙩𝙚𝙞 𝙝𝙖𝙣𝙖𝙢𝙞. 𝘼𝙢𝙚𝙣
Haleluya No. 144 4, 5: Bolag Ope na Golap In >> https://bit.ly/3wIw2pj
~Pdt J Wismar Saragih, Tadah ni Tonduyta 15/11
tnt1115
Recent Comments