Mei 6: “Holong do uhurmu Bangku”?

“O Simon anak ni si Johannes, holong do uhurmu Bangku? (Joh. 21 :16)

Ai ma sungkun-sungkun ni Tuhan Jesus bani si Petrus. Pala do tolu hali sonai tong sungkun-sungkunni. Manguji uhur ni si Petrus do Ia. Balos ni si Petrus: “Ibotoh Ham do haganupan ibotoh Ham do holong ni uhurhu Bamu!”

Roh do Tuhan Jesus mamungkun uhurta: “Holong do uhurmu Bangku? Manguji uhurta homa. Sai iurupi Naibata ma hita ase boi hita mambaloskon: Tuhan, ibotoh Ham do haganup. Ibotoh Ham do holong ni uhurhu Bamu! Tapi Tuhan, sihol tambah ope holongku Bamu.

Hunja do iguruhon si Petrus mangkaholongi Tuhan in? Rap do ia pakon Tuhan Jesus tolu tahun dokahni. Halani holongni bani Tuhan Jesus, lang be itadingkon Tuhan Jesus, lalab orod ma ia. Tapi i pudi dob roh parlajoan gabe galek ma haporsayaonni. Taridah ma ai sanggah tartangkap Tuhan Jesus, sanggah i rumah ni malim bolon ondi, iporsou si Petrus ma Tuhan Jesus pala tolu hali, pala ibijahon: “Seng hutanda Ia”. Tapi dob mangkawah Tuhan Jesus dompak si Petrus, dob pajumpah panonggor sidea, ibagas horu ni uhur pakon holong ni uhur Tuhanta mangkawahkon si Petrus. Gabe iahap si Petrus ma dousani. Sonai ma ibagas borngin na golap ai ia laho hu darat tangis sosombopon.

Paima dumpar pajumpah si Petrus pakon Tuhan Jesus, sai idingat do dousani. Tongon domma namin isopotkon dousani anjaha isasap Tuhan Jesus, gabe boi ma ia marmalas ni uhur. Jadi lambin banggal ma holongni bani Tuhan Jesus. Tapi ase ibogei susian na legan na dob mulak uhur ni Tuhan Jesus bani si Petrus, ai do ase isungkun pala tolu hali tembal ni pinorsouni ai Ia tolu hali.

Ham Tuhan Jesus! Luarhon ham ma bani tonduyhu na holong do uhur-Mu bangku, ase hubotoh mangkatahon: “Ibotoh Ham do holong ni uhurhu Bamu”. Amen.

Haleluya No. 132 : 1,3: Ai Ambit Lang Do Ham >>