Mei 3: “Ahu do parmahan na dear”

 

 

“Ahu do parmahan na dear, hutanda do sagala na bangku” (Johannes 10 : 14)

 

Anggo parmahan na madear, itanda do sada-sada biri-birini na sahulanan ai. Ibotoh do hinagogohni ampa hinagalekni. Isarihon do sidea humbani holongni. Anggo boritan sada biri-biri, itambari do ai janah ipauli-uli. Anggo manlembang sada biri-biri humbani hulanan ai, ialop do ai janah iboan mulak. Anggo roh parmaraan bani biri-biri ai mintor is do halang hampit parmaraan ai. ljaga janah ibobai do biri-birini ai.

Ipatudos Tuhan Jesus do dirini bani parmahan na dear: “Ahu do parmahan na dear” nini “Hutanda do biri-biringku”. Ijaga do ganup halak na masuk hu Bani. Itanda do sidea ganupan. Ibotoh do atap na margogoh atap na galek sidea. Ia roh parlajoan na paganggang sidea humbani Tuhan Jesus, tarolos do Ia laho mangurupi. Ilambung ni sidea do Ia sanggah parmaraan. Ibere do gogoh ase margogoh janah monang marimbang parlajoan.

Anggo laho mardousa biri-birini, ialop do ai mulak bani hulanan, mulak bani kuria. Roh do Tuhan Jesus ibagas damei ipargogohi do tonduy-Ni.

Nasiam na porsaya (susian sonari). Ulang pala mabiar ham, ai parmahan na madear do Tuhanta, dompak ham do pangkawahni, atap ija pe ham marianan. Ibotoh do na masa bamu ari-ari. Parlajoan atap pusok ni uhur na legan pe. Sai hasomananni do ham bani sitaronon pakon paruntolon. Tarima kasih ma uhurmu halani parmahanon-Ni bamu. Tarima kasih ma halani pangkasomani-Ni bani goluhmu ari-ari.

Domma iahap ham hinadear ni parmahanon ni Parmahan na Madear ai bani tonduymu, bani dirimu? Porlu do paahapahapon, ai age pe dear parmahan nini atap ise pe anggo seng dear iahap ham, harugianmu do ai.

Sai tarahap ma bamu hinadear ni parmahanon ni Tuhanta bamu.

 

Ham Tuhan Jesus! Parmahan na madear do Ham, biri-biri pinarmahanmu do ahu. Togu-togu Ham ma ahu bani dalan na sintong. Patenger Ham ma uhurhu bani parmahanonmu bangku, ase sonang ahu mandalani goluh on. Amen.

Haleluya No. 192 : 1 – 4: Haholongi Siparmahan >>

1. Haholongi si Parmahan na dear maruhur in,

Tuhan Jesus do mamorsan, haganupan dousamin.

 

2. Anggo kahou biri-biri, na pinarmahan-Ni in,

ra matektek do iluh-Ni laho mangindahi in.

 

3. Tor lamlam do pangabing-Ni bai ganup na kahou in,

paulakkon hu harangni humbai halimisan in.

 

4. Sai jojor do isarihon ganup pinahan-Ni in,

ai daroh-Ni iduruskkon manggalari utangnin.