Mei 27: Bona ni Hagoluhanta

 

“Sai patidak ma hu bannami Tuhan Naibata, idop ni uhur-Mu anjaha useihon bannami hatuahon-Mu”! (Psalmen 85: 8)

 

Tontu iahap ham do pardousa ham, domma iakuhon ham ibagas uhurmu na ilanggar ham titah ni Naibata na pansing ai. Masihol uhurmu bani hapintoron ni Naibata. Tontu manungkun ham ibagas uhurmu: Sonaha do paluahkon ahu humbani dousangku? Sonaha do ase boi mulak ahu hubani Naibata?

Porlu ibotoh ham dong do sada hatuahon ni jolma manisia, ai ma Jesus na matei tarsilang. Iporsan do dousanta bani angkulani bani hayu ai. Ia ugahan halani panlanggaronta, janah tarpantom halani hajahatonta, ase boi mardamei hita hubani Naibata.

Roh ma ham hu Bani marhitei tonggomu, ibere ma ham hatuahon. Seng dong hatuahon ibagas dousa. Bani Tuhan Jesus do bona ni hatuahon. Pindo hita ma: Tuhan, useihon Ham ma hu bangku hatuahon-Mu! Ulak-ulak janah elek-elek ma, jadi bereon-Ni ma bamu hatuahon ai, ai ma pardomuan ampa pardamean pakon Naibata. Tuhan Jesus do badan ni holong pakon idop ni uhur ni Naibata. Anggo ipindo hita: Patidak Ham ma bannami idop ni uhur-Mu, artini ai patidak Ham bannami Tuhan Jesus. Tuhan Jesus do hatuahon ni Naibata.

Anggo iuseihon banta hatuahon-Ni, gabe torang ma banta ise Tuhan Jesus. Ai ma Sipaluah janah Sipagoluh hita.

Tonduy na Pansing ai do use patorangkon tangkas hu banta. On ma sada tonggo atap pangindoan ase itanda hita tangkas idop ni uhur ni Naibata na ibagas Jesus Kristus. Panandaonta bani Jesus Kristus do bona ni hagoluhanta. Anggo seng itanda hita Sipaluah ija tarbahen maluah hita?

 
Ham Tuhan Naibata, Bapanami na i nagoriatas! Halak pardousa na madoyuk do hanami,na sangap marmulia do Ham. Tarima kasih banggal ma Bamu, ra do Ham patidak hatuahonMu bannami. Useihon Ham ma hatuahonMu ai bannami. Amen.

Haleluya No. 133: 1,4,7: Holong do Atei >>

1. Holong do atei ni Naibatangku
parholong atei mangidah au.
Ai ipasirsir do haluahonku
marhitei Jesus Anak-Ni in.
4. Na roh do Jesus pardameianku,
Parmahan Banggal na bujur in.
Ai do ‘se ningku tong:
Holong do atei ni Naibatangku mangidah au.
7. Hagoluhanku tongtong Hata-Ni,
sombuh horahku binaen ni in.
Ai do ‘se ningku tong:
Holong do atei ni Naibatangku mangidah au.

mu160527