“Seng hupindohon ase toguon-Mu sidea hun dunia on, tapi ase iparorot Ham sidea dompak pangagou”. (Johanes 17 : 15)
Ai ma sabagian tonggo ni Tuhan Jesus laho mantonggohon anak susian-Ni ijia. (Bani terjemahan baru ihatahon, “Seng hupindo, ase buatonmu sidea hun dunia on, tapi ase iramotkon Ham do sidea dompak pangagou“). Sedo pitah susian sanggah ijia itonggohon sonai, dihut do hita susian (Kristen) sondahan on itonggohon, ase iramotkon Naibata susian in dompak na jahat.
Aha do pangagou nidok ni Tuhanta ijon? Sedo naborit atap hamatean atap sitaronon na legan, ai marhiteihon ai boi do hita marlajar mambalosi Naibata. Na jahat atap pangagou nidok ni Tuhanta ijon, ai ma dousa. Iramotkon Naibata ma ulang itangkap janah irajai dousa hita. Ai dousa ai manirang jolma humbani Naibata, dousa ai mambahen jolma hu naraka, ai do pangagou ai. Ibotoh hita anggo tonggo ni Tuhan Jesus itangihon Naibata do. Itonggohon Tuhanta do hita.
Ase dohor do Naibata ilambungta manolong hita. Halani ai pangkei ma hita marparlahou. Buei do parlajoan bani goluh on, gogoh do sibolis sihol mantaluhon hita, tapi gogohan do Naibata manramotkon hita. Ai ma pangunsagahon hita, itonggohon Tuhan Jesus do hita ase ulang mardousa, ulang talu hita ibahen dousa. Dihut ma ai mambere gogoh banta mangimbang dousa pakon parlajoan.
Ijolom Naibata do ham marhiteihon gogohni tapi ningon ra do hita manjalo Tonduy pakon gogohni ai. Hita pe maningon martonggo mangindo gogoh ai homa.
Sonari malas ma uhurta mangimbang dousa pakon parlajoan, ai anggo ipindo hita pangurupi ni Tuhanta mintor ibere do, ai domma itonggohon hinan hita ase iramotkon Naibata humbani pangagou, humbani dousa.
Anggo ipabondil ham panonggormu, ihirah*) ham podangmu, lambin megah ma sibolis ai, tapi anggo ipapitpit ham panonggormu janah ilompit ham tanganmu laho martonggo, mabiar do sibolis ai.
Ham Bapanami na i nagoriatas! Tarima kasih ma Bamu halani iramotkon Ham hanami humbani pangagou, ase ulang italuhon dousa hanami. Amen.
Haleluya No. 127: 1, 2: Jahowa Siparmahan Au >>
1. Jahowa Siparmahan au, aha pe lang hurangni.
Na sambor pe sai ipadaoh, do humbai pinahan-Ni
Tudu ibaen na lanbut in, lao pagoluhkon tonduyhin.
Ibaen holong atei-Ni.
2. Itogu au bai na lihou, bah tubuh hagoluhan.
Ibaen do tonduyhin siou, bai dalan hasonangan.
Sonang do uhurhin tongtong, sadokah au itanoh on,
pasangapkon goran-Ni.
———————
*) hirah = “ancam, hunus, sentak, kelebat, mengelebatkan”
tnt160523
Recent Comments