“Ase marhinsah ni uhur ma hita mangayaki hotak paridop ni uhuran ase dapotan parontou ni uhur pakon idop ni uhur hita, bahen partolongan bani panorang na dearhonsi”. (Heb. 4 :16)
Dong do banta Malim Bolon i nagoriatas. Jesus Kristus na dob matei tarsilang janah puho humbani na matei. Domma manggoluh hinan Ia i tanoh on anjaha tarlajou pasal haganup songon hita, tapi seng mardousa. Hona parlajoan do Ia humbani na jahat pakon sibolis. Itaron do na lohean pakon na horahan. Ai do ase holong uhurni banta na hona parlajoan, atap ibagas sitaronon ni daging, uhur pakon tonduy hita. Ai ma ase patut tenger uhurta magindo partolongan Bani, bani panorang na porlu, ibagas sagala haru ni uhurta.
Ase anggo hona parlajoan ham humbani sibolis atap jolma, ingat ham ma Jesus na dob tarlajou ai, na margogoh mantaluhon sibolis. Boi do ibere bamu gogoh mangimbang parlajoan ai, asal ma ipindo ham. Turi-turihon ham ma bani Tuhan Jesus, sonaha sunsah ni pangahapmu, bereonni do pinindomu, ase dear use pangahapmu. Sonaha pe maholni sonaha pe boratni sai patugah ham ma bani Tuhan Jesus janah pindo ham partolonganni. Ra do Ia margogohi na galek, ase monang ham.
Songon dakdanak ma hita na patugahkon bani namatorasni sagala na mandorngitni, sonai ma hita dompak Tuhanta. Marhinsah ni uhur ma hita mangajaki hotak paridop ni uhuran ai, ase dapotan parontou ni uhur pakon idop ni uhur hita bani sagala panorang na porlu.
Sipasomalon do tong mansahapkon bani Tuhanta atap aha pe na sinarihon ni uhurta. Ibagas malas ni uhur pe, ulang lansei hita marsahapkon Tuhanta. Maningon padam do hita marsahapi pakon Tuhanta. Jadi bani panorang pusok ni uhurta pe seng be borat uhurta roh hu Bani.
Ham Tuhan Jesus! Tarima kasih ma Bamu halani manatap do Ham bani hagalekkonnami janah marontou do uhurMu mangidah hanami pardousa banggal on. Amen.
Haleluya No. 114 : 1,3: Gopas Parugas Nima >>
mu160502
Padam = terbiasa