5 Maret: Arti ni Pandidion na Mapansing

Terjemahan baru (LAI, 1973), “Ai do usihan ni pandidion in, na paluahkon nasiam nuan: sedo ai songon na mangambukkon na mabutak humbani angkula, tapi ipindo hita do ijin humbani Naibata panggora ni uhur na borsih, marhitei parpuho ni Jesus Kristus”. (Ep. 5:26.)

Bani ganup halak na tardidi roh do Naibata, mangkatahon: Sonari hudilo ma ho hubagas harajaon ni Naibata, huain ma ho gabe niombah-Ku, lang be uhumon ho romban hubani dousamu, tapi romban hubani pangkopkopon ni Tuhan Jesus Kristus.

Ibere do Tonduyni bani na tardidi ai na mangkatahon sonon: Domma hupungkah horjang-Ku ibagas dirimu, ibagas uhurmu, toruskonon-Ku do ai holi bani ari Jesus Kristus. Ibahen Naibata pe sonon sedo halani hita, halani idop ni uhurni tumang do mangidah hita. Ipamasa do pandidion banta paima dong atap aha horjanta na madear, aima manaksihon paboa sedo halani hapintoranta hita maluah, tapi sabonar idop ni uhur ni Naibata dibagas Jesus Kristus.

Halani ai parombang hita ma parlahouta bani pandidion na dob jinalonta. Anggo dong parlajouan roh hubanta, na manirang hita humbani haporsayaon, ingat hita ma idop ni uhur ni Naibata na do ijalo hita marhitei pandidion. Domma ijalo Naibata hita songon anak sanggah na tardidi ai hita. Domma ihatahon Naibata, sasap ma dousanta sanggah na tardidi ai, halani Tuhan Jesus Kristus na mangkopkop hita.

Porlu tumang banta pardomuan pakon Naibata sanggah na tardiri ai, aima gogohta ibagas sagala parlajouan na roh hubanta.

Parhorjaan ni Tonduy na Pansing ibagas uhurta, aima mambahen lambin tangi uhurta bani panggora ni uhurta na dob ipasusi Tonduy ni Naibata, aima panggora ni uhur na madear ai.

Ham Tuhan Naibata, Bapa nami! Tarimakasih ma Bamu halani holong ni uhurmu bannami. Urupi Ham ma hanami ase tangkas iahap hanami ai. Sai torang ma bannami na dob ijalo Ham hanami gabe niombahmu, mamungkah humbani na tardidi hanami. Amen.

Haleluya No. 93: 2, 3 Seng Hapalang be Megahku

1. Seng hapalang be megahku ibaen na tardidi in.
Mambur do hadorsaonku ampa ganup dousangkin
na mananda arta na majenges na maharga,
lobih humbai tuahkin sadokah dokahni in.

2. Sahei ma ganup utangku ibaen na tardidi au:
Uhum seng habiaranku ikahui Jesus au.
Ai daroh-Ni huparidi sanggah masuk au tardidi.
Jadi malas uhurhin sadokah-dokahni in.

3.Bolis, tangar ma hatangku: domma tardidi au.
Ningon ho taluhononku anggo ujionmu au.
Seng be dong ahamu bangku Jesus do ompungni au.
Jadi malas uhurhin sadokah-dokahni in.