Marlintun ma hita ibagas sabar ni uhur hubani parporangon niondoskon banta. Mangkawah ma hita dompak Jesus pambobai pakon pandobkon haporsayaon in. (Heber 12: lb. 2a)
Terjemahan baru (1973, LAI) “anjaha marsabar ni uhur ma hita marlintun bani parlumbaan, na adong i lobeita. Ibagas ai mangkawah ma hita dompak Jesus, sipungkah ampa sidobkon haporsayaon in”
Ganupan do hita maruntol ibagas goluh on. Sai dong do na mahol bontasonta. Hahurangan ni tadah ari-ari, pakean, hahurangan ni parugas i rumah, hurang ni duit patorsa sikolah ni dakdanak, balanja mangabaru, duit patambar, lang targorani buei ni siporangon na ondos banta, na jonjon ilobeita.
Ibagas sisonai ulang hita galek, marlintun ma hita ibagas sabar ni uhur, ase tong togar uhurta, bersemangat mandompakkon ai ganupan, ia sonaha pe masamni.
Mangkawah ma hita dompak Jesus pambobai pakon pandobkon haporsayaonta in. Sonaha pe paruntolon ni Tuhanta sabar do Ia janah sai rosuh ni Naibata do arian ni parporangonni. Itadingkon sagala hasomanni pe Ia, tapi iahapkon seng itadingkon Naibata Ia. Itaron do ganup ibagas hasabaron.
Tapi anggo ipatudos hita, aha ma sitarononta marimbang sitaronon ni Tuhan Jesus. Tapi sabar do Ia mandalankon, marlintun tene mansuhuni rosuh ni Naibata paima Naibata sandiri paujungkon parlawanon paruntolon ai.
Maila hita martorap ibagas paruntolonta, mungut-ungut hita, marhutuk hita, seng sabar hita: Mase sonon, mase sonan, ninta.
Boanonta ma dousanta pasal ai bani Naibata, anjaha pindo hita hasasapanni. Pindo hita homa gogoh pakon hinsah ni uhur pakon sabar ni uhur manaron sitaronon ari-ari.
Ham Tuhan Jesus! Bere Ham ma bannami sabar ni uhur pakon hinsah ni uhur mandompakkon sagala siporsanon ari-ari. Pargogohi Ham hanami mamorsan na pinaporsankonmu bannami. Amen.
Haleluya No. 114: 2, 3, 114. Gopas Parugasnima
2.Tangihon pandilo-Ni hu parmusuhan in;
Irikkon ma hata-Ni mangimbang dousa in.
Tuhanmu hasomanmu manahan munsuh in.
Tongtong sai hatengerhon Tuhanta Jesus in.
3. Seng dong tarpangajamhon pargogoh diri da.
Ai seng dong in margagan anggo bai Naibata.
Ai sihol bereon-Ni do bam sinjata-Nin.
Ai seng tarbaen lang talu munsuhmu baenon-Nin.
Recent Comments