20 Maret: Maningon narotapi do tenger ni uhur bani na legan

 

“Mintor idilohon bapa ni dakdanak ai ma : porsaya do ahu! Urupi ham ma ahu bani hurang ni haporsayaonku”! (Markus 9:24)

Terjemahan baru (LAI 1973), “Mintor idilohon bapa ni dakdanak ai ma gogoh: Porsaya do ahu! Urupi Ham ma ahu na so marhaporsayaon on”.

Ai ma panaksihon pakon pangindoan ni bapa ni dakdanak ai: “Porsaya do ahu! Urupi Ham ma ahu bani hurang ni haporsayaonku”. Domma dong haporsayaonni mambahen iboan dakdanak ai bani Tuhan Jesus, tapi iahap do homa hurang ni haporsayaonni, lape gok tumang. “Anggo tarkahua Ham” nini. Lape porsaya botul ia na boi do Tuhan Jesus pamalum anakni ai, tapi porsaya do ia na dob buei do pinamalum ni Tuhan Jesus.

Songon haporsayaon ni halak on do buei haporsayaon ni hita halak Kristen. Porsaya do ia, tapi hurang do tenger ni uhurni bani Tuhan Jesus. Ase tardidi pe halak, ase gabe Kristen pe ibahen domma dong haporsayaonni. Isaksihon do ilobei ni Kuria na porsaya do sagala na lape tardiri bani Naibata Sitolusada ai. Tapi sai tarahap do ari-ari hurang ni haporsayaonta.

Porlu ma homa tonggonta songon tonggo ni bapa ni anak nongkan: Porsaya do ahu! Urupi Ham ma ahu bani hurang ni haporsayaonku”. Sihol ma dong sura-sura banta ase tambah haporsayaonta. Sura-sura ai ma mangojur hita mangindo bani Tuhanta, ase itambahi haporsayaonta.

Sai ulang ma sonang uhurta bani haporsayaonta na etek ai. Maningon roh banggalni haporsayaonta, roh tamasni, roh toguhni.

Dalan patambah haporsayaon Naibata do. Hata ni Naibata do bogeonta basaonta, ai ma naparimbagaskon. Marsahap gati Naibata banta marsahap homa gati hita bani Naibata, bani Tuhanta (martonggo). Ningon gok do tenger ni uhurta bani Naibata.

Halani ai maningon narotapi do tenger ni uhur bani na legan, bani arta, hapentaran, hasangapon, diha-diha. Ulang homa dong be tenger ni uhurta bani uti-utian sapari, pasi-pasi ni ugama sapari, atap haporsayaon na hinaporsayaan ni halak deba, sikah ni tangan, bintang. Ganupan ai mamuati haporsayaon bani Naibata do ai.

 

Tuhan! Sonari pe porsaya do ahu. Tambahi Ham ma haporsayaonku na hurang ai. Amen.

Haleluya No. 117:1, 2. Pitah Jesus Hubaen Hasomanku

1. Pitah Jesus hubaen hasomanku

Ia do na pasonangkon au
Ningon sai tongtong torang langkahku
anggo rapkon Jesus in au lao
anggo rapkon Jesus in au lao.
 
2 . Tanoh pakon laut sonang hu bontas,
anggo sai iiring Jesus au.
Hu nagori atas pe sai torus,
do boanon ni Tuhanku au,
do boanon ni Tuhanku au.