Dob ai roh ma sada naboru pardousa parhuta in, halani ibotoh na dob hundul mangan Ia (Jesus) i rumah ni Parisei in, iboan ma sada hasa alabastar na gok minak na morum. Mangkatariluh do ia jongjong ipudi ni nahei ni Jesus, ipungkah ma mangarbahi naheini marhitei iluhni. (Lukas 7: 37, 38)
Na dihut do Tuhan Jesus bani parpestaan mangan-mangan i rumah ni si Simon Parisei. Sanggah martumpu sidea masuk ma sada naboru. Roh do naboru ai halani ibogei ijai Tuhan Jesus, ai maningon jumpahsi Ia. Tapi pardousa do naboru ai, itanda halak do paramangonni sanggah manggoluh. Hiri do parinangon ai ididah halak, iahap pe hiri do ia.
Tapi dong sada na so pahirisi iahap, tapi holong do uhurni mangidahsi, ai ma Tuhan Jesus. Seng marsahap ia, tapi nanget idohori ma Tuhan Jesus hun pudi janah humaridei iluhni. Iluhni ai, ai ma iluh hamubahon humbani dosa anjaha masihol ase maluah humbani panrahut ni dousa. Ia mangkatektek ma iluhni bani nahei ni Tuhan Jesus, jambulani ma ibahen mangapusi, isummah ma nahei ni Tuhan Jesus janah iminaki bani minak na misbou ai.
Si Simon Parisei ai marpingkir: Mase nani ipaturut Jesus ia, ai seng nani ibotoh pardousa naboru ai? Atap sedo na tongon nabi Jesus on ninuhurni. Ai ambit ibotoh pardousa naboru on, tontu lang ibere sonai.
Tapi Tuhan Jesus lobihan nabi do, ai na mangindahi janah pagoluhkon na magou do Ia ase roh, paluahkon pardousa. Ibotoh do homa pangindoan ni uhur ni naboru ai ase mardamei ia pakon Naibata. Halani ai maidop ma uhur-Ni. Idompakkon ma naboru ai anjaha ihatahon bani: “Domma sasap dousamu, haporsayaonmu do paluah ho, mardamei ma ho mulak!”.
Ham Tuhan Jesus! Banggal ni idop ni uhur-Mu bani pardousa na mansopotkon dousani, ai ma mangapoh hanami pardousa on. Sasap Ham ma dousanami ganupan, holong ma ateimu. Amen.
Haleluya. No. 147 : 1, 3. Ham Naibata Banggal Tumang >>
1. Ham Naibata banggal tumang, janah borat dousangku,
Seng dong ijon itanoh on, tarbaen haporusanku.
3. On pe Bamu naman au roh, sai ulang tulak ahu;
Pahombun Ham, O Naibata, panringis-Mu hu bangku.
Recent Comments