24 Juni: Hagogohon ni Naibata ibagas Ambilan Namadear

“Ai seng huhailahon Ambilan na Madear in, ai hagogohon ni Naibata do ai paluahkon sagala na porsaya”. (Roma 1 : 16)

Isuratkon Apostel Paulus: la Ambilan na Madear hagogohon ni Naibata do ai. Margogoh do ai manjalo pardousa. Tapi sadokah porsaya halak bani gogohni atap parombouni, seng masuk hujai hagogohon ni Ambilan na Madear ai. Halak na boi ninuhurni mangurupi dirini seng porlu bani pangurupi ni Naibata.

Sonai ma pingkiran ni Apostel Paulus, ilajou do mandalankon titah ni Naibata, iuji ase ulang pamandangon namin. Masuk ma ia ninuhurni hu nagoriatas. Tapi tong dong sora ibagas uhurni na so dong damei ibagas uhurni, sai ihusipkon pasal dousani, iahapkon pasal Jesus Kristus, tapi seng itangihon sora ai. Ipatendel uhurni. Seng iparduli Ambilan na Madear ai. Ipahiri do Ambilan na Madear. Ipahiri ma halak Kristen, itangkap janah ipatutupkon. Tapi seng dong labani. Lalab do seng dong damei ibagas uhurni, lalab do seng sonang tonduyni. Roh ma Tuhan Jesus sandiri bani si Paulus sanggah idalan laho hu Damaskus ia, sanggah laho manangkap Kristen na ijai. Tunduk ma ia bani Tuhan Jesus ijai. Manungkun ma Ia pasal parburuonni: Mase iparburu ho Ahu?

Hunjia nari mardamei ma uhur ni Apostel Paulus, janah sonang ma uhurni na sunsah hinan. Ijai ma iahap dong do hagogohon ni Naibata ibagas Ambilan na Madear, ai ma pasal Jesus Kristus na mamboan damei pakon sonang ni uhur, sonai homa hagogohon paubah uhur, ase margoluh na baru diri na romban bani harosuh ni Naibata.

Domma iahap ham hagogohon ni Ambilan na Madear in? Domma iahap ham iparandang Ambilan na Madear goluhmu? Goluh na rundut hinan?

Roh ma ham bani Tuhan Jesus ase ipatorang paruhuranmu.

Ham Tuhan Naibata! Sal iahap hanami ma hagogohon ni Ambilan na Madear pasal Anak-Mu Tuhan Jesus Kristus, Sipaluah hanami. Amen.

Haleluya No. 143: 1, 2, 4: O Tonduy na Manggoki Uhur >>

1. O Tonduy na manggoki uhur, ni saksi-saksi na parlobei in,
Seng ongga-ongga marnamundur, mangimbang munsuh ni Tuhanta in
Puhoi pakon uhur nami on mandodingkon
2 . Andohar apuy-Mu ma gara, marlintun bani bangsa haganup,
Jahowa, Ham paingkat halak na bujur mangkatahon hata-Mu,
Kawahkon Ham bolag sabion in, jabolon-Mu seng piga ope in.
4. Antong buei baen Ham suruhan, na sai tongtong igoki Tonduy-Mu.
Janah na ringgas marambilan manogu halak hu gomgoman-Mu,
Taluhon Ham sibolis in tongtong ramoti hata-Mu i tanoh on.

tnt0624

25 Juni: Arti Marnalang Diri >>

<< 23 Juni: Gok Bamu do Sonari