Tuhan, ulang loja ham! Ai na hurang talup do ahu pala roh Ham hu jabungku. (Lukas 7: 6)
Dong do juak-juak ni komandan na i Kapemaum ai na parah boritan. Isuruh ma partua-partua ni Yahudi roh bani Tuhan Jesus, tudu sanggah i Kapernaum Ia. Dob das suruhan a ielek-elek ma Tuhan Jesus ase ra la pamalum juak-juakni ai. Na patut do ai nini sidea ai holong do ateini bani bangsanta, pala ipaturei sinagoge (gareja) banta. Jadi iirikkon Tuhan Jesus ma sidea. Dob lang sadiha daoh be hun rumahni, isuruh ma huanni manjumpahkon hu dalan mangkatahon bani Tuhan Jesus sonon: “Tuhan, ulang loja Ham! Ai hurang talup do ahu pala roh Ham hu jabungku. Halani ai do homa, huhira, seng talup diringku marayak Ham”.
Legan do pangidah ni halak Jahudi bani komandan ni halak Roma on: Na sangap do ia, na markuasa do. Rumahni pe jenges do, talup do manjalo tamuei age sonaha sangapni masuk hu rumah ai. Halani ididah halak Jahudi pardaratni ai.
Legan do timbangan ni komandan ai pasal hauhuronni do ipatudos bani hauhuron ni Tuhan Jesus. Dirini itorih hubagas uhurni. Ididah ma hahuranganni ampa hasurungan ni Tuhan Jesus. Idingati hatani ampa hauhuronni ipatudos pakon hata ampa hauhuron ni Tuhan Jesus ronsi pambahenanni, domma padaoh-daoh, otik pe lang padohor be, ai ma ase iluarhon tonahni ai: “Seng talup Ham roh hu jabungku”.
Martuah ma halak ma mangahapkon hahuranganni, na so talup be dapotan pangurupi humbani Tuhan Jesus, pangahap ai ma pasirsirhonsi manjalo partolongan ni Tuhanta. Tapi halak na mangahap dear ni horjani ilobei ni Naibata janah patut dapotan pasu-pasu humbani Naibata, ai ma na so dapotan. Marlajar ma hita humbani komandan sipajuh begu-begu in.
Ham Tuhan Jesus! Seng talup pala ingatonmu hanami, halani dousanami pakon butak ni parlahounami. Tapi halani holong ni ateimu pala matei Ham halani hanami, parontou ni uhurmu do hansa. Paahapkon Ham ma ai bannami. Amen.
Haleluya No. 132: 1, 2. Ai Ambit Lang do Ham >>
1. Ai ambit lang do Ham parholong atei Ham huja ma au.
Halani holong-Mu ampakon layak-Mu, hu surga au.
2. Tarima kasih ma Bamu o Naibata parlayak Ham!
Sibahen dalan in marhitei Jesus in hu surga in.
Recent Comments