1 Februari: Ibagas botoh ni Naibata do

 

Seng anjai mabiar ia bani barita na jahat, totap do uhurni, tenger do uhurni bani Jahowa. (Psalm 112: 7)

Terjemahan baru: “Seng mabiar ia bani barita na masambor, totap do uhurni marhatengeran bani Jahowa“.

Masa do martorap das banta barita jahat, artini, na laho roh na marsedahon hita, anakta atop borunta, atop bani hinaholonganta na legan. Artini domma ondam atap raih na masa ai. Tarpaksa do hita gobir, hitir, mabiar, atap rusak: Sadihari ma nani saud ai?

Pangkorhon ni ai bulinsah ma uhurta ibagas, seng be marhasonangan, seng tarpodom be borngin. Anggo sonai ma, tanda do ai banta na hurang tenger uhurta bani Naibata. Lupa do hita, ai aha pe seng dong na masa i dunia on na so ibagas botoh ni Naibata.

Ibotoh hita homa, na holong do uhur ni Naibata mangidah hita, songon bapa mangidah niombahni, lobihni ai do tene holong ni atei ni Naibata bani sagala na mangkabiarisi. Iponopkon do hita hutoruh ni habongni, idingdingi do hita dompak na jahat, ihatahon do malekatni manramotkon ho bani sagala dalantau (Psalm 91: 4, 11).

Haporsayaon na sonai ai ma padaoh biar hubanta, ia kabar na jahat na sonaha pe ibogei hita. Jolom hita ma poltik sagala bagah-bagah ni Naibata na tarsurat bani Hatani (Bibel). Ase dong honsi habiarta atap pasal aha pe, mintor sahapkon hita bani Naibata. Tarsurat do: “Ulang haru uhur nasiam mangkirahon age aha pe, tapi pabotohkon nasiam hu bani Naibata pangindoan nasiam marhitei tonggo pangindoan marhasoman tarima kasih, anjaha damei ni Naibata no mangatasi ganup hauhuron, ai ma manramotkon uhur pakon pingkiran nasiam ibagas Kristus Jesus” (Pil 4: 6, 7). (Terjemahan baru, “Ulang ma haru uhur nasiam pasal atap aha pe, tapi pabotohkon nasiam ma pangindoan nasiam bani Naibata marhasoman tonggo, elek-elek ampa tarima kasih. Anjaha damei ni Naibata, na mangatasi haganup paruhuron, in ma manramotkon uhur ampa pingkiran nasiam ibagas Kristus Jesus“!)

 

Pingkiran ni sibolis ase sai lupa hita mardingat Naibata pakon Hatani, ningon maruntol hita mandalankon suhar-suharni ai: Ingat ma hita bani Hata pakon bani bagah-bagah ni Naibata.

 

Ham Tuhan Naibata, Bapanami! Bere Ham use tenger tumang uhur nami Bamu. Amen

Haleluya No. 127: 1, 3. Jahowa Siparmahan Au >>

1. Jahowa Siparmahan au, aha pe lang hurangni.
Na sambor pe sai ipadaon, do humbai pinahan-Ni
Tudu ibaen na lambut in, lao pagoluhkon tonduyhin.
Ibaen holong atei-Ni.
3. Itanoh hamateian pe seng pala habiaran.
Ai isondangi do hape sonang do au mardalan.
Simambu pakon tungkot-Mu do pasonangkon uhur hin,
Hal do sijolomanku.