Ahu do hayu anggur in, hanima do ranting in. Na marianan ibagas Ahu, anjaha Ahu ibagas dirini, in ma na marbuahkon buei, seng tarhorjahon hanima age aha, anggo seng marhasoman Ahu. (Johanes 15: 5)
Ganup do hita mananda senter, ai ma rigapan moderen, na so ra miloh age iombus logou age pe hona udan. Bola ni senter ai sedo na nahit hinan. Dob pe ikontakkon manjalir ma gogoh na bani batu ni senter ai hubani bolani ai, jadi marsinalsal ma bola ni senter ai. Anggo lang be kontak mulak ma horlom ma horlom songon sapari bola ni senter ai.
Songon bola ni senter ai do hita, seng dong tarbahen hita age aha harosuh ni Naibata humbani hadirionta sandiri. Halani ai do ase porlu hita kontak bani Tuhan Jesus, ase manjalir hagogohonni ai banta, gabe margogoh ma hita idahon age pe namin sedo gogohta sandiri ai, gogoh ni Tuhanta do. Anggo mardomu hita pakon Tuhanta manjalir ma banta malas ni uhur gabe malas ma uhurta. manjalir ma hubanta holong-Ni, gabe marholong ma hita dompak hasomanta. Ijai malas ma uhurta mangkorjahon harosuh ni Naibata. Anggo seda ma pardomuanta pakon Tuhan Jesus, horlom ma uhurta, horjanta pe lang be dompak harosuh ni Naibata.
Halani ai ari-ari ulang lansei hita mangulaki pardomuan ai pakon Tuhan Jesus. Holong ni Tuhanta do mangojur hita mandalankon ai. Ase tong homa manjalir idop ni uhumi hu banta.
Dua do dalan na mambahen pardomuan ai bani Tuhanta. Sada mambogei pakon marimbagaskon hata-Ni. Dob ai martonggo ampa mandoding humbani pongkut ni uhur dompak Naibata ronsi mangkatahon tarima kasih hu Bani.
Jagaonta ma ase ulang dong na marseda pardomuanta ai. Tuhan Jesus do haju anggur hita do rantingni. Ningon marjalimotan do pardomuan ni haju anggur ai bani rantingni, janah dos do masam ni hayuni pakon rantingni. Dos do bau ni hulit ni hayuni pakon hulit ni rantingni. Sihol ma namin sagala na marsaor pakon hita iahapkon, botul do hita ranting ni Tuhan Jesus, halani paruhuronta, parsahapta pakon pambahenanta, mangusihi hauhuron pakon pambahenan ni Tuhan Jesus tarlobih pasal holong-Ni.
Ham Tuhan Jesus! Tarima kasih ma Bamu ai ibere Ham do gogoh bannami mangkorjahon harosuh ni Bapa in. Amen.
Haleluya No. 8: 1, 2: O Jesus Hasomani >>
1. O Jesus hasomani hanami haganup
Pasada uhur nami, ase torang ganup
2. Seng boi dalanonnami sanlangkah na torsa:
Dob Ham hasomannami. torang age huja.
9 Desember: Domma roh harajaon ni Naibata das hubagas uhurta? >>
Recent Comments